Týr var ekki spenntur fyrir því að horft yrði til Reykjavíkurmódelsins með afbrigðum þegar kemur að stjórn landsmálanna. Það var ekki að ástæðulausu.

Oddvitar stjórnarflokkanna kynntu þingmálaskrána á fundi með blaðamönnum á mánudag. Það vakti athygli Týs að eitt fyrsta málið sem bar á góma á fundinum var tilkynning Ingu Sæland, félags- og húsnæðismálaráðherra, um að örorku- og lífeyrisþegar myndu eftir sem áður fá greidda desemberuppbót líkt og á undanförnum árum. Það kom Tý á óvart að ekki var tilkynnt í framhaldinu um að ríkisstjórnin myndi halda áfram að styðja við hundahald í sveitum, en það er svo sem önnur saga.

Inga hefur fengið þetta í gegn ásamt því að breyta reglum um styrki til fjölmiðla þannig að styrkir til fjölmiðla sem hafa haft frumkvæði að fjalla um mál sem eru óþægileg fyrir ríkisstjórnina verði skertir.

***
Eins og fram kom á fundinum leggur ríkisstjórnin mikla áherslu á að bregðast við ástandinu á fasteignamarkaði. Banna á fólki að leigja út íbúðir sínar til ferðamanna og það á að afgreiða frumvarp húsnæðismála um auknar niðurgreiðslur til óhagnaðardrifinna leigufélaga.

Á sama tíma og ríkisstjórn Kristrúnar Frostadóttur boðar þetta er meirihlutinn í Reykjavík að vinna gegn markmiðum ríkisstjórnarinnar. Einar Þorsteinsson borgarstjóri hefur lagt til að gatnagerðargjöld í Reykjavík verði hækkuð um 85% frá og með 1. september og verður tillagan tekin til umfjöllunar í vikunni. Væntanlega er tillagan til marks um hversu vel meirihlutanum hefur gengið við að ná stjórn á fjármálum borgarinnar.

***
Þetta þýðir að byggingarkostnaður í Reykjavík mun hækka á bilinu ein til tvær milljónir á hverja íbúð í borginni eftir stærð. Kjartan Magnússon, borgarfulltrúi Sjálfstæðisflokksins, bendir á að breytingin feli einnig í sér að tekið verði upp gatnagerðargjald á bíla- og hjólageymslur ofanjarðar og þar af leiðandi sé hækkunin í raun meiri en 85%.

Eins og bent var á í umfjöllun Viðskiptablaðsins þá mun kostnaður vegna gjalda greiddra til borgarinnar eftir breytingarnar nema um tíu milljónum króna fyrir 100 fermetra íbúð í fjölbýlishúsi. Allur þessi kostnaður mun auðvitað leita út í fasteignaverðið og leiguverðið.

Týr er einn af föstum ritstjórnardálkum Viðskiptablaðsins. Þessi birtist fyrst í blaðinu sem kom út 5. febrúar 2025.