Á undanförnum misserum hafa heyrst háværar raddir um íþyngjandi regluvæðingu Evrópusambandsins, sérstaklega á atvinnulífið. Viðkvæðið er að Bandaríkin komi með nýjungar, Kína búi til eftirlíkingar en Evrópa regluvæði. Evrópusambandið hefur enda verið óþreytandi við að gera kröfur á evrópsk fyrirtæki um hvers kyns skýrslugjafir og upplýsingar, einkum þegar viðkemur sjálfbærniregluverki.