Framsóknarmenn allra flokka keppast nú við að sannfæra almenning um að einokun sé skilvirkasta leiðin til þess að halda vöruverði lágu og tryggja hag neytenda.
Tilefnið er kaup Kaupfélags Skagfirðinga á Kjarnafæði Norðlenska sem sagt var frá í vikunni. Viðskiptin eru ekki háð samþykki Páls Gunnars Pálssonar í Samkeppniseftirlitinu eftir umdeildar lagabreytingar sem gerðar voru síðasta vetur.
Í aðsendri grein í Morgunblaðinu á þriðjudag segir Sigurjón Rafnsson aðstoðarkaupfélagsstjóri KS, og hægri hönd Þórólfs Gíslasonar kaupfélagsstjóra, kaupin vera nauðsynleg viðbrögð við samkeppni frá erlendum framleiðslufyrirtækjum. Hrafnarnir geta að einhverju leyti fallist á þá röksemd og benda í því samhengi á tillögur verkefnastjórnar um landbúnaðarstefnu, sem Björn Bjarnason sat meðal annars í, sem skipuð var fyrir nokkrum árum. Meðal tillagnanna var að auka samstarf innlendra kjötframleiðenda gegn því að tollar á innfluttu kjöti verði lækkaðir. Þá gætu kaupfélagsmenn stundað sína einokun í friði í sveitum landsins á meðan aðgengi neytenda að innfluttu gæðakjöti á góðu verði væri tryggt.
Huginn og Muninn er einn af föstum ritstjórnardálkum Viðskiptablaðsins. Þessi pistill birtist fyrst í Viðskiptablaðinu sem kom út 10. júlí.
