Þrátt fyrir að mikil eftirsjá sé eftir Bjarna Benediktssyni úr stjórnmálunum þá breytir fráhvarf hans ekki þeirri staðreynd að stjórnarandstaðan á Alþingi verður grá fyrir járnum á kjörtímabilinu.
Nú þegar Jón Gunnarsson tekur sæti Bjarna þá hafa sex stjórnarandstöðuþingmenn gegnt embætti dómsmálaráðherra svo eitthvert dæmi sé tekið. Auk Jóns hafa Áslaug Arna Sigurbjörnsdóttir, Guðrún Hafsteinsdóttir, Sigríður Andersen og Þórdís Gylfadóttir farið með dómsmálin í ríkisstjórn og Sigmundur Davíð Gunnlaugsson gegndi jafnframt embættinu um hríð í forsætisráðherratíð sinni. Þorbjörg Sigríður Gunnlaugsdóttir dómsmálaráðherra fagnar sjálfsagt aðhaldinu sem í þessu felst en hún ásamt öðrum ráðherrum hefur ekki reynslu af slíkum störfum að Þorgerði Katrínu Gunnarsdóttur utanríkisráðherra undanskilinni.
Við þetta bætist að uppistaðan í þingflokkum stjórnarflokkanna er fólk með litla reynslu af þingstörfum. Það er mál manna að stjórnarandstaðan sé eitt óárennilegasta lið sem hefur verið sett saman frá því að John Salley, Rick Mahorn, Bill Laimber og hin hörkutólin í Detroit Pistons gerðu allt vitlaust í NBA-deildinni á níunda áratugnum og við upphaf þess tíunda.
Huginn og Muninn er einn af föstum ritstjórnardálkum Viðskiptablaðsins.Þessi birtist fyrst í blaðinu sem kom út 8. janúar 2025.
