Af öllum þeim aragrúa sem er til af ríkisstofnunum er Lyfjastofnun Íslands í hvað mestu uppáhaldi hjá hröfnunum að Geislavörnum ríkisins undand skildum.
Sem kunnugt er þá boðaði Bjarni Benediktsson þáverandi fjármálaráðherra að allar stofnanir ríkisins ættu að draga útgjöld saman um 2% á þessu ári þegar hann kynnti fjárlagafrumvarp sitt.
Rúna Hauksdóttir Hvannberg forstjóri Lyfjastofnunar var ekki lengi að bregðast við þessu en tilkynnt var á dögunum að þessi 84 manna stofnun myndi ekki lengur svara símtölum frá þeim sem til hennar þurfa að leita. Þó er hægt að senda inn erindi og óska eftir símtali frá starfsmönnum stofnunarinnar ef mikið liggur við. Þá skellti forstjórinn skollaeyrum við ákall frá verkalýðshreyfingunni og atvinnurekendum um að ríkisstofnanir sýndu hófsemi þegar kom að verðhækkunum á vörum um áramótin og hækkaði gjaldskrá sína um 8,7%.
Huginn og Muninn er einn af föstum ritstjórnardálkum Viðskiptablaðsins. Þessi birtist í blaðinu sem kom út 17. janúar 2024.
