Hrafnarnir heyra að farið sé að renna tvær grímur á Framsóknarmenn í Suðurkjördæmi og efasemdir séu uppi um að sameining flokksins við Höllu Hrund Logadóttir hafi verið góð hugmynd.
Að minnsta kosti virðast flokksmenn hafi stórlega ofmetið fjölda „gangnamanna á Austur-Síðuafrétti“ og ekki er útlit fyrir að Halla Hrund muni taka Sigurð Inga Jóhannsson formann flokksins sem er í öðru sæti í kjördæminu. Hrafnarnir heyra að aðgerðarleysi Höllu í embætti orkumálastjóra sé ekki að hjálpa í þessum efnum. Vestmanneyingar eru minnugir um dráttinn sem varð á því að fyrirtækið Laxey fengi leyfi til bora eftir vatni vegna uppbyggingar á landeldi. Leyfisbeiðnin var hjá Orkustofnun í ár og fékkst ekki fyrr en að Halla fór í leyfi vegna forsetaframboðs.
Þá grunar hrafnana að Unnur Brá Konráðsdóttir, aðstoðarmaður Guðlaugs Þórs Þórðarsonar orkumálaráðherra, tali fyrir marga Sunnlendinga en hún sendi Höllu væna sneið á samfélagsmiðlum um helgina: „Það sem stóð fyrrum orkumálastjóra helst fyrir þrifum í sínu fyrra embætti var megn andstaða hennar við aukna orkuöflun í landinu og skilnings- eða skeytingarleysi gagnvart hlutverki sínu, lögum og stjórnsýslureglum eins og dæmin sanna.“
Huginn og Muninn er einn af föstum ritstjórnardálkum Viðskptablaðsins. Þessi pistill birtist fyrst í blaðinu sem kom út 27. nóvember 2024.
