Hrafnarnir gera upp árið 2023 í tímaritinu Áramót. Þar kemur meðal annars gervingreindin við sögu.
Á Íslandi bar það einna helst til tíðinda árið 2023 að Gunnar Smári Egilsson áhrifavaldur og framkvæmdastjóri Sósíalistaflokksins leysti verðbólguvandann í eitt skipti fyrir öll.
Það gerði hann þegar hann drakk Moggann sinn og las kaffið sitt einn morgun í september og deildi svo lausninni á samfélagsmiðlum: „Verðbólga er ekki vandamál í sjálfu sér. Vandinn er að hækkun verðlags skerðir kaupmátt. Við því er tvennt að gera. Annars vegar að hækka launin til að verja kaupmáttinn. Og hins vegar lækka verðið með verðlagseftirliti og banni við verðhækkunum.“
Tásurnar á Bjarna
Tásurnar á Bjarna Jónssyni þingmanni Vinstri grænna eru tásur ársins að mati hrafnanna. Ásgeir Jónsson seðlabankastjóri setti þjóðfélagið á hliðina í fyrravetur þegar hann benti á tásumyndina frá Tene sem líklega skýringu á þenslu og þrálátri verðbólgu í hagkerfinu. Með öðrum orðum væru þau þar til marks um að íslensk heimili væru að nýta uppsafnaðan sparnað sinn í útlöndum með þeim efnahagslegu áhrifum að Seðlabankinn þyrfti að hækka vexti.
Margir veltu fyrir sér hvort Ásgeir hefði ekki frekar átt að láta þessi orð falla í fjölskylduboði en á vaxtarákvörðunarfundi. Bjarni er nefnilega bróðir Ásgeirs og meðal ferðaglöðustu manna á Alþingi. Hann hefur verið í harðri samkeppni við Þórhildi Sunnu Ævarsdóttur þingmann Pírata um hver geti ferðast meira á kostnað skattgreiðenda undanfarin ár. Stimpluðu þau sig bæði í sögubækurnar árið 2023 þegar þau brutu bæði 2 milljóna króna múrinn í dagpeningasöfnun vegna erlendra ferðalaga.
Nánar er fjallað um málið í Áramótum, tímariti Viðskiptablaðsins og Frjálsrar verslunar sem kemur út í fyrramálið. Áskrifendur geta nálgast umfjöllunina í heild undir blöðin á vb.is klukkan 19:30.
