Hrafnarnir klóra sér í kollinum yfir opnunarhátíð Ólympíuleikanna í París, nánar tiltekið þeirri staðreynd að skiptar skoðanir eru meðal Íslendinga á málinu.
Þar var kallast á við þekkt minni úr hinum kristna arfi sem fangað var í hinu mikla málverki Leonardo da Vinci. Hrafnarnir telja að Íslendingar eigi að vera stoltir af þessu atriði enda sækir það augljóslega innblástur til markaðsstarfs Biskupsstofu þegar Agnes M. Sigurðardóttir gegndi embættinu.
Fyrir fjórum árum birti Þjóðkirkjan auglýsingaherferð um Sunnudagaskólana sem skartaði meðal annars tignarlegum regnboga og skeggjuðum Jesú sem var barmagóður með afbrigðum. Þessi auglýsingaherferð vakti ekki síðri athygli en opnunarhátíð Ólympíuleikanna.
Huginn og Muninn er einn af föstum ritstjórnardálkum Viðskiptablaðsins. Þessi pistill birtist fyrst í blaðinu sem kom út 31. júlí 2024.
