Hrafnarnir vita sem er að íslenskir vísindamenn eru í fremstu röð þegar kemur að rannsóknum og óvæntum niðurstöðum. Þannig hefur Þóroddur Bjarnason prófessor í félagsfræði við Háskóla Íslands komist að þeirri niðurstöðu í nýrri rannsókn að fólk vilji alls ekki búa í miðborg Reykjavíkur. Þessi uppgötvun á án efa eftir að hafa mikil áhrif á fasteignamarkaðinn en sem kunnugt er hefur fermetraverð íbúðarhúsnæðis alla tíð verið hæst í miðborginni miðað við önnur hverfi þrátt fyrir að enginn vilji búa þar samkvæmt Þóroddi.
Niðurstaða Þórodds kemur í kjölfar annarrar rannsóknar hvers niðurstöður ögruðu hefðbundinni hugsun um samgöngumál. Daði Baldur Ottósson, samgönguverkfræðingur hjá EFLU, kynnti á ráðstefnu Vegagerðarinnar þau óvæntu tíðindi að lengri tíma tekur að ferðast um höfuðborgarsvæðið með strætó en einkabílnum.
Þessar tvær merkilegu rannsóknir bera íslensku fræðasamfélagi fagurt vitni og minna þær um margt á merkilega mannfræðirannsókn sem birt var í Tímariti um viðskipti og efnahagsmál í fyrra. Í þeirri rannsókn sýnir Kristín Loftsdóttir, prófessor í mannfræði við Háskóla Íslands, að Íslendingar ferðist fyrst og fremst til Tenerife vegna veðurfars og strandlífsins en ekki vegna safna og menningartengdrar ferðaþjónustu.
Huginn og Muninn er skoðanapistill á vegum Viðskiptablaðsins.
