Gengi Íslandsbanka er í hæstu hæðum um þessar mundir og eru flestir sammála um að núverandi aðstæður á hlutabréfamarkaðnum komi til með að styðja við gengi bréfanna enn frekar.
Ljóst er að leynivinur Páls Magnússonar nagar nú sig í handarbökin yfir að hafa selt strax eftir síðasta útboð. Hrafnarnir heyra á mönnum á markaði að komnar séu upp kjöraðstæður til þess að ríkisstjórnin láti hendur standa fram úr ermum og hrindi af stað boðaðri sölu á hlut ríkisins í bankanum. Undirbúningsvinnunni lauk í tíð síðustu ríkisstjórnar og í raun ekki eftir neinu að bíða öðru en að skipstjórinn kalli „lagó“.
Kristrún Frostadóttir forsætisráðherra og aðrir leiðtogar ríkisstjórnarinnar hafa sagt að ekki verði hróflað við fjárlögum ársins og þau gera ráð fyrir hagnaði af sölu á hlut ríkisins í bankanum. Margir bíða því spenntir eftir leiðsögn Daða Más Kristóferssonar fjármálaráðherra í þessum efnum en lítið hefur heyrst til hans eftir að hann tók við embætti. Hrafnarnir greina töluverða óþreyju meðal þeirra sem starfa á markaðnum enda eru flestir þeirra skoðunar að hagsmunir ríkisins séu að ráðast í söluna fyrr frekar en síðar.
Huginn og Muninn er einn af föstum ritstjórnarpistlum Viðskiptablaðsins. Þessi birtist fyrst í blaðinu sem kom út 8. janúar 2025.
