Það hefur verið gaman að fylgjast með góðum árangri líftæknifyrirtækisins Oculis. Fyrirtækið ‎hefur verið á miklu flugi og framgangur í ‏þróun og klínískum rannsóknum framar vonum. Sjö bandarískir greiningaraðilar fylgjast náið með Oculis og mæla allir með kaupum í fyrirtækinu. Helmingur ‏þeirra hækkuðu verðmöt sín fyrr í þessum mánuði, sem eru að meðaltali tvöfalt hærri en virði þess á markaði.

Engu að síður hafa hlutabréf fyrirtækisins lækkað umtalsvert frá sínu hæsta gildi í janúar síðastliðnum,‏ þegar ‏verð á hlut stóð í 3.300 krónum. Í þessu felast tækifæri að mínu mati.

Ég skrifaði síðast um kauptækifæri í Oculis í október á síðasta ári, eftir að hafa komið inn í hluthafahópinn þegar gengi hlutabréfa stóð í 1.650 krónum á hlut. Á undanförnum vikum hef ég haldið áfram að kaupa í fyrirtækinu enda tel ég virði Oculis verulega vanmetið á markaði. Að mínu mati er Oculis áhugaverðasta vaxtarfyrirtækið á íslenskum hlutabréfamarkaði og miklar líkur á ‏ því að fyrirtækið verði tekið yfir að hluta eða öllu leiti fyrir lok næsta árs.

Leiðandi alþjóðlegir fjárfestingasjóðir á sviði heilbrigðisvísinda standa að baki félaginu og áhugi íslenskra lífeyrissjóða er vaxandi. Það væri hinsvegar áhugavert að sjá forsvarsmenn eignast‎ýringa og einkabankaþjónustu setja sig betur inn í viðskiptamódel Oculis og kynna fyrir viðskiptavinum sínum.

Hvað gerir Oculis?

Líftæknifyrirtækið Oculis vinnur að þróun augnlyfja sem munu hafa byltingarkennd áhrif á meðferðir við alvarlegum augnsjúkdómum um allan heim. Markmið fyrirtækisins er að bæta sjón þeirra sem glíma við augnsjúkdóma og stórbæta meðferðarúrræði. Oculis, sem stofnað var af íslenskum prófessorum við Háskóla Íslands og Landspítalann, var skráð á Nasdaq hlutabréfamarkaðinn í mars árið 2023. Ári síðar var fyrirtækið sömuleiðis skráð á Aðalmarkað Kauphallar Íslands. Þrjú lyf eru í klínískri ‏þróun hjá fyrirtækinu um þessar mundir:

  • OCS-01 – fyrstu augndropar fyrir sjónudepilsbjúg af völdum sykursýki. Gera má ráð fyrir að fjöldi sjúklinga í Bandaríkjunum sé 1,3 milljónir og árlegur meðferðarkostnaður per sjúkling um 5,500 bandaríkjadalir.
  • OCS-05 – fyrsta taugaverndandi lyfið gegn bráðri sjóntaugabólgu („AON“) sem kann einnig að hafa víðtæka notkunarmöguleika við öðrum augntaugasjúkdómum. Talið er að um 65 þúsund sjúklingar ‏‏séu með AON. Gangi áætlanir eftir, getur lyfið orðið það langstærsta hjá Oculis og árlegur meðferðarkostnaður allt að 100.000 bandaríkjadalir per sjúkling, þó vissulega sé nokkuð snemmt að spá fyrir um það nákvæmlega. Oculis mun jafnframt hefja rannsóknir á meðferð við tveimur öðrum augnsjúkdómum: NAION (Non-Arteritic Anterior Ischemic Optic Neuropathy) og RRMS (Relapsing-Remitting Multiple Sclerosis), líkt og kynnt var á nýlegum fjárfestadegi þann 14. apríl sl. Þetta eru góðar fréttir fyrir sjúklinga enda eru mikil tækifæri fyrir Oculis að bæta meðferðir við ‏þessum sjúkdómum og ‏ þá sérstaklega RRMS, sem er fyrirhuguð meðferð fyrir MS sjúklinga, með markaðsstærð allt að 15 milljarða bandaríkjadala á ári.
  • OCS-02 - augndropar sem innihalda TNF-hamlara líftæknilyf, sem vinna gegn augnþurrki („DED“). Um er að ræða fyrsta staðbundna lyfið við DED en þesskonar lyf fá oft skilvirkara umsóknarferli hjá FDA, auk ‏ þess sem verðlagning slíkra lyfja er að jafnaði hærra og auðveldara að fá tryggt. Gera má ráð fyrir að fjöldi sjúklinga sem gætu n‎ýtt sér meðferðina er hún kemur á markað sé um tvær milljónir og árlegur meðferðarkostnaður á bilinu 4-9.000 bandaríkjadalir.

Höfum augastað á eftirfarandi áföngum

Uppl‎ýsingagjöf og væntingastjórnun Oculis hefur verið markviss og jarðbundin. Vissulega er ‏það krefjandi verkefni að kynna viðskiptamódel líftæknifyrirtækis eins og Oculis hér á landi, þar sem takmörkuð þekking er á starfsemi þannig fyrirtækja. Ég skora á íslenska greinendur að gefa út verðmöt og fræðiefni fyrir fjárfesta hér á landi, enda tel ég mikinn áhuga vera fyrir slíku.

Ólíkt öðrum vaxtarfélögum hér á landi er rekstur Oculis fjármagnaður til ársins 2028 og leiðandi alþjóðlegir fjárfestingasjóðir veita gott fjárhagslegt bakland til framtíðar. Stjórnendur hafa mikinn trúverðugleika á markaði og láta ekki tímabundnar verðsveiflur hlutabréfa hafa áhrif á upplýsingagjöf. Þá man ég t.d. ekki til ‏ þess að forstjóri Oculis hafi gefið viðtöl við íslenska viðskiptamiðla, enda er markhópur félagsins fyrst og fremst alþjóðlegir fjárfestar. Augljóslega hafa stjórnendur Oculis ekki viljað skapa of miklar væntingar til fyrirtækisins hér á landi og ‏er það skynsamleg nálgun. Hugsanlega er þó tímabært að auka vitund einkabanka, eignast‎ýringa og almennings sem er nú byrjaður að fjárfesta í hlutabréfum á n‎ýjan leik eins og nýlegt útboð Íslandsbanka sýndi okkur.

Það eru spennandi tímar framundan hjá Oculis og fjöldi mikilvægra áfanga framundan sem gott er að hafa augastað á eins og meðfylgjandi tafla sýnir:

Yfirtökuviðræður fyrir lok árs 2026

Oculis hefur vakið mikla athygli í Bandaríkjunum og aðeins er tímaspursmál að mínu mati hvenær alþjóðleg lyfjafyrirtæki horfa til þess að gera yfirtökutilboð í fyrirtækið eða gera tilboð um kaup á einstaka lyfjum. Erfitt getur verið að spá fyrir um tímasetningu slíkra ‏þreifinga en algengt er að stóru lyfjafyrirtækin horfi til þess að markaðsleyfi hafi fengist í Bandaríkjunum eða að stórir áfangar séu í höfn í klínískum rannsóknum, áður en yfirtökur koma til skoðunar.

Uppbygging Oculis hefur miðast við að starfsemi þess verði tekin yfir á einhverjum tímapunkti og kaupandi ráði yfir öflugu söluneti og verksmiðjum á stærsta lyfjamarkaði heims. Sérhæfing Oculis liggur í metnaðarfullu þróunarstarfi og skráningum lyfja en markaðssetning, sala og lyfjaframleiðsla er síðan allt annar tebolli. Ég hef mikla trú á því að viðræður um yfirtöku á Oculis hefjist á næsta ári, þó ómögulegt sé að tímasetja slíkt með mikilli vissu. Gangi ‏spá mín eftir og fyrirtækið nær fyrirhuguðum áföngum, má varlega áætla að yfirtökuvirði á Oculis í heild sinni geti verið ferfalt eða fimmfalt núverandi markaðsvirði.

N‎ýlegar yfirtökur sambærilegra fyrirtækja

Mig langar að benda á tiltölulega n‎ýleg viðskipti er tengjast lyfjum með sambærilega virkni og OCS-01 (eitt af þremur lyfjum í þróun hjá OCS). Sérstaklega á samanburðurinn vel við lyf Xiidra á meðan lyf Restoret er að hluta enn í klínískum rannsóknum og mun hugsanlega hafa breiðari meðferðarvirkni. Í n‎ýlegum greiningum kemur fram að verðmæti OCS-05 getur verið umtalsvert meira en OCS-01 og OCS-02 til samans. Bein áhrif á verðmöt koma ‏ þó síðar fram fyrir OCS-05, eða samhliða framgangi í klínískum rannsóknum.

  • Júní 2023 – lyfjafyrirtækið Bausch+Lomb keypti augnlyfjafyrirtækið Xiidra af Novartis fyrir allt að 2,5 milljarða Bandaríkjadala (2,5 X virði Oculis). Endanlegt kaupverð byggir á tilteknum áföngum og endanlegt kaupverð kann að lækka.
  • Maí 2024 - lyfjafyrirtækið Merck yfirtók augnlyfjafyrirtækið Restoret með árangurstengdri greiðslu að fjárhæð allt að þremur milljörðum Bandaríkjadala (3 X virði Oculis). Restoret er með lyf í þróun sem getur meðhöndlað sjónhimnubjúg í sykursýki (DME lyf) sem er sambærilegt OCS-01 að því leyti.

Oculis hefur fengið verðskuldaða athygli í Bandaríkjunum og veit ég til að mynda ekki til þess að sambærileg fyrirtæki hafi sjö útgefin verðmöt af bandarískum aðilum. Til samanburðar eru fjórir erlendir aðilar sem gefa út verðmöt fyrir Alvotech (þar af tveir í Bandaríkjunum) og þrír fyrir Amaroq (enginn í Bandaríkjunum). Greiningaaðilar uppfæra verðmöt sín með reglulegum hætti fyrir Oculis og eru þau einróma. Mikil tækifæri felast í kaupum í hlutabréfum Oculis.

Höfundur er búsettur í Sviss og sinnir fjárfestingum í verðbréfum og fasteignum. Hann og tengdir aðilar eru hluthafar í Oculis.