Daði Már Kristófersson fjármálaráðherra kýs af einhverjum ástæðum að koma fram nakinn. Enginn hefur þó veitt því athygli fyrr en Bergþór Ólafsson leiðtogi stjórnarandstöðunnar benti á þá staðreynd, sem hefði auðvitað átt að vera öllum augljós.
Í óundirbúnum fyrirspurnum á Alþingi í gær spurði Bergþór Daða út í minnisblað sem fjármálaráðuneytið sendi frá sér um frumvarp sem er runnið undan rótum Flokks fólksins, Ingu Sælands, um að tengja bótagreiðslur almannatrygginga við launavísitöluna. Í minnisblaðinu kemur fram að frumvarp Ingu sé algjör þvæla sem grafi undan sjálfbærni ríkisfjármála.
Enda blasir það við að erfitt verður að hafa yfirsýn yfir ríkisútgjöld þegar það þarf ekki annað en róbótavæðingu í einhverjum iðnaði, sem eykur framleiðni og hagvöxt, til að auka bótagreiðslur ríkisins.
Eigi að síður segist Daði styðja frumvarpið. Í svari sínu á Alþingi sagðist hann hafa stutt frumvarpið og hann muni styðja það áfram. Fyrirséð hafi verið að frumvarpið muni hafa ófyrirsjáanleg áhrif, en að lagt hafi verið mat á ófyrirsjáanleikann.
Bergþór benti ráðherra, eðli málsins samkvæmt, á þverstæðuna sem í þessu felst. Í sjálfu sér er ráðuneyti í stjórnarráði ekkert annað en ráðherrann sjálfur. Ráðuneytið varar við afleiðingum lögfestingar frumvarpsins, enda telur það ógn við sjálfbærni ríkisfjármála. Síðan stígur Daði, fjármálaráðherra, fram og segist efnislega vera ósammála skoðun sinni.
Að standa við allt ruglið
„Ég stend við allt ruglið sem ég hef áður sagt,“ sagði Dan Quayle, varaforseti Bandaríkjanna í forsetatíð George Bush eldri eitt sinn, og Tý þykir ljóst hvar fjármálaráðherrann sækir sínar fyrirmyndir. Við þetta má svo bæta að fjármálaráðherra tók sérstaklega fram í umræðunum að hann stæði „fyrir heiðarlegri stjórnsýslu“. Bergþór var sammála því mati að Daði virtist standa einmitt í vegi fyrir henni.
Hrós fyrir starfsmenn fjármálaráðuneytisins
Að endingu telur Týr fulla ástæðu til þess að hrósa starfsmönnum fjármálaráðuneytisins. Skynsemi þeirra og sannfæring virðist ekki vera jafn auðkeypt og starfssystkina þeirra í atvinnuvegaráðuneytinu. Það ágæta fólk sagði í greinargerð sinni við frumvarp atvinnuvegaráðherra um tvöföldun veiðigjalda að það myndi ekki hafa nein áhrif á fjárfestingar og rekstrarákvarðanir sjávarútvegsfyrirtækja. Síðan að þau orð voru látin falla hafa útgerðarfyrirtæki blásið af milljarða fjárfestingar sem voru áformaðar á næstu árum.
Týr hlakkar til að heyra fréttir af því þegar – og ef – þessir spekingar verða kallaðir til að standa fyrir máli sínu hjá atvinnuveganefnd.
Týr er einn af föstum ritstjórnardálkum Viðskiptablaðsins.
