Þarmaflóran samanstendur af milljörðum örvera sem búa í meltingarvegi okkar og gegna mikilvægu hlutverki í meltingu, ónæmiskerfi og jafnvel geðheilsu. Hér eru nokkur af bestu ráðunum til að viðhalda og bæta góða þarmaflóru.
Borða fjölbreytt mataræði
Þarmaflóran þrífst best á fjölbreyttu mataræði sem inniheldur mikið af trefjaríkum matvælum, ávöxtum, grænmeti og heilkornum. Fjölbreyttur matur stuðlar að fjölbreyttari flóru örvera, sem er talin vera lykilatriði fyrir góða heilsu. Gott er að miða við að borða 20-30 mismunandi tegundir matvæla úr plönturíkinu í hverri viku.
Góðgerlar og forlífsgerlar
Góðgerlar eru lifandi örverur sem geta haft jákvæð áhrif á heilsu. Þær finnast í matvælum eins og jógúrti, súrkál, kefir og öðrum gerjuðum matvælum. Forlífsgerlar örva fjölgun á vinsamlegum bakteríum í þarmaflórunni og er að finna í ýmsum matvælum eins og lauk, hvítlauk og ætiþistlum. Hægt að fá góðgerla og forlífsgerla í töfluformi.
Takmarka notkun sykurs og sætuefna
Óhófleg inntaka sykurs og gervisætuefna getur haft neikvæð áhrif á þarmaflóruna með því að ýta undir fjölgun skaðlegra baktería. Að halda sykurneyslu í skefjum getur því hjálpað til við að viðhalda heilbrigðri flóru.
Forðast óþarfa notkun sýklalyfja
Sýklalyf geta eyðilagt bæði slæmar og góðar bakteríur í þörmunum. Óþarfa notkun sýklalyfja getur því skaðað þarmaflóruna og veikt ónæmiskerfið. Því er mikilvægt að nota sýklalyf aðeins þegar þau eru nauðsynleg og samkvæmt ráðleggingum læknis.
Hreyfing
Regluleg hreyfing getur haft jákvæð áhrif á þarmaflóruna. Rannsóknir hafa sýnt að hreyfing getur stuðlað að fjölbreyttari og heilbrigðari flóru örvera í meltingarveginum.
Nægur svefn
Góður svefn er mikilvægur fyrir almennt heilbrigði og einnig fyrir þarmaflóruna. Svefnleysi og lélegur svefn geta haft neikvæð áhrif á jafnvægi örveruflórunnar.
Forðast streitu
Langvarandi streita getur haft skaðleg áhrif á þarmaflóruna. Að stunda slökunartækni, s.s. hugleiðslu, jóga og djúpslökun, getur hjálpað til við að minnka streitu og þar með vernda þarmaflóruna.
