Í lok maí tilkynnti Rannís um fyrri úthlutun úr Hljóðritasjóði árið 2022. Félagið Kópbois ehf. sem er rekstrarfélag Árna Páls Árnasonar eða Herra Hnetusmjörs, fékk úthlutað samtals 600.000 króna styrk til hljóðritunar á sjöttu breiðskífu Herra Hnetusmjörs.
Alls bárust 106 umsóknir í sjóðinn og fengu 59 verkefni styrki fyrir samtals 28 milljónir króna.
Umsókn um opinbera styrki kemur eflaust einhverum aðdáendum rapparans á óvart, en í lagi sínu Keyra sem kom út árið 2018 segir skáldið:
„Þeir tala um pening en þeir sóttu um listamannalaun
Gaur, Kópbois lifa ekki þannig.”
Það má velta því fyrir sér hvort að tekjufall vegna heimsfaraldurs valdi því að Herra Hnetusmjör gangi á bak orða sinna. Á árinu 2021 voru rekstrartekjur Kópbois ehf. tæplega 31 milljón króna samanborið við 20 milljónir árið áður. En árið 2019 námu tekjurnar 31 milljón og skilaði þá 7,5 milljónum í hagnað.
