Straumfjarðará er ein af betri fjögurra stanga ám landsins. Daníel Njarðarson hefur verið staðarhaldari og yfirleiðsögumaður við ána undanfarin ár. Hann lýsir henni sem klassískri laxveiðiá. Veiðistaðirnir séu í raun jafn fjölbreyttir og landslagið. Straumfjarðarárlaxinn sé stæltur og vel haldinn. Eftirspurnin eftir veiðileyfum sé mikil enda sumarið fullbókað.
Á sunnanverðu Snæfellsnesi er fjöldi góðra laxveiðiáa og í þeim hópi er Straumfjarðará. Straumfjarðará er dragá í Eyja- og Miklaholtshreppi. Þegar ekið er Vatnaleiðina frá Vegamótum norður yfir Snæfellsnes fylgir áin veginum langleiðina að Baulárvallavatni en þar á hún upptök sín, sem og í uppsprettum Köldukvíslar í Kerlingarskarð
Í neðri hluta Straumfjarðarár bætist nokkuð við af vatni, þar sem árnar Fáskrúð, Grímsá og Laxá í Miklaholtshreppi renna í hana. Haldi veiðimenn að hér sé farið með fleipur þá er ekki svo því hér er ekki verið að tala um Fáskrúð í Dölum heldur á Snæfellsnesi og ekki heldur Grímsá í Borgarfirði heldur á Snæfellsnesi.
Dreisam ehf., sem er í eigu Jónasar Hagan Guðmundssonar, hefur verið með Straumfjarðará á sínum snærum síðan árið 2021. Daníel Njarðarson, hefur verið staðarhaldari og yfirleiðsögumaður í Straumfjarðará undanfarin ár.
Daníel er 24 ára en þrátt fyrir ungan aldur er hann þaulvanur veiðimaður. Hann byrjaði ungur í leiðsögn í Norðurá en árið 2022 færði hann sig yfir í Straumfjarðará. Þó þessar tvær ár séu nefndar hér hefur hann einnig stundað leiðsögn víða annars staðar. Einhverjir veiðimenn kannast líka eflaust við andlitið því hann starfaði í veiðibúðinni Vesturröst um árabil með framhaldsskóla en Daníel kláraði meistaranám í lögfræði við Háskóla Íslands í vor og hefur meðfram náminu starfað á Libra lögmönnum á Tjarnargötu.
Klassísk laxveiðiá
Daníel segir að Straumfjarðará sé að mörgu leyti klassísk laxveiðiá.
„Efsti foss árinnar, Rjúkandi, liggur í fallegu gljúfri og opnast gljúfrið svo í kjölfarið þegar veiðistaðnum Gíslakvörn sleppir,“ segir hann. „Við taka hraðir klapparstrengir allt að Svartabakka, en í neðri hluta þess veiðistaðar hægist verulega á ánni og rennur hún meira eða minna um grasbakka næsta þriðjung árinnar eða allt þar til komið er niður að Sjávarfosssvæðinu. Þar taka við á ný hraðari staðir og er áin þá einnig orðin vatnsmeiri vegna hliðaránna Grímsár og Fáskrúðar, sem sameinast Straumfjarðará við veiðistaðinn Neðri-Ármót stuttu ofan við Sjávarfoss.
Straumfjarðará er því mjög fjölbreytt og í henni má finna staði af öllum toga. Þá er það kostur við Straumfjarðará að hún verður aldrei hættulega vatnslítil.“
Næstum því ómerkt
Daníel segir að engin veiðistaðaskilti séu á bökkum árinnar. Þetta þyki mörgum vönum veiðimönnum heillandi enda upplifunin sú að þeir gætu allt eins verið staddir við ána á 17. öld. Hann segir að þar með sé samt ekki öll sagan sögð.
„Þó engin skilti séu við ána þá er hún vel merkt í hinu frábæra appi AnglingIQ og þar má sömuleiðis finna veiðistaðalýsingu. Merktir veiðistaðir eru 31 talsins. Þá sést staðsetning veiðimannsins í appinu, sem gerir það að verkum að auðvelt er að átta sig á aðstæðum.“
Fjögurra stanga á
Veitt er á fjórar stangir í Straumfjarðará. Daníel segir algengast að veiðimenn noti einhendu fyrir línu sex til átta.
„Persónulega finnst mér alltaf gott að hafa einnig léttar tvíhendur og switch-stangir við hendina og þá sérstaklega í miklu vatni enda getur Straumfjarðará vaxið mjög hratt þegar rignir og því er alltaf gott að grípa þessar stangir með.“
Að sögn Daníels er langbest að nota flotlínu. Á öllum góðum reglum séu samt undantekningar og á allra köldustu septemberdögunum sé gott af hafa stuttan, 4 til 6 feta, sökkenda í vopnabúrinu. Skeyta svo 2 til 4 feta hefðbundnu taumaefni framan við sökkendann.
„Með þessu er hægt að vinna með smáflugur aðeins undir yfirborðinu þegar laxinn er latari við að koma af sama ákafa upp í þær. Smáflugur, hitch og örtúpur í yfirborðinu eru yfirleitt þær aflahæstuí Straumfjarðará. Þegar kalt er geta örkeilur einnig verið fengsælar.“
Vænir fiskar
Undanfarin ár hefur ársveiðin verið á bilinu 350 til 400 laxar. Laxinn er vel haldinn í Straumfjarðará því meðalstærðin í fyrra var 65 sentímetrar og meðalþyngdin 3,1 kíló eða 6,2 íslensk veiðipund. Skylt er að sleppa öllum laxi í Straumfjarðará og hefur það verið reglan síðan núverandi leigutakar tóku við ánni af Stangaveiðifélagi Reykjavíkur árið 2021. Að sögn Daníels þá er Straumfjarðaráin eina áin á Vesturlandi, þar sem skylt er að sleppa öllum laxi.
Að sögn Daníels þá er smálaxinn í Straumfjarðará stæltur en á hverju ári veiðist einnig vænir stórlaxar, sem dæmi hafi einn 97 sentímetra komið á land í september í fyrra.
