Guðrún Sóley Gunnarssdóttir fjármálahagfræðingur starfar sem aðstoðarframkvæmdarstjóri á skrifstofu bankastjóra Seðlabankans þar sem hún stýrir deild skrifstofustjórnar og samskipta. Hún er einnig fyrrverandi knattspyrnukona, uppalin í KR og á að baki 65 landsleiki með A – landsliðinu.
Örlög leikmanna eru ekki alltaf í þeirra höndum en knattspyrnuferill Guðrúnar Sóleyjar endaði vegna höfuðmeiðsla sem hún varð fyrir í leik með landsliðinu á Evrópumeistaramótinu í Finnlandi 2009.
„Ég sá ekki endilega fyrir mér þá að þetta yrðu endalokin á ferlinum en ég var lengi að jafna mig á meiðslunum. Þetta var samt bara eitthvað sem gerðist og aðlögunarferlið var nokkuð langt að því að átta mig á að ég myndi ekki spila fótbolta á hæsta stigi aftur,“ segir Guðrún Sóley um meiðslin.
Hún gekk í gegnum ýmislegt á sínum ferli með tilheyrandi gleði en einnig sárum töpum og meiðslum sem tók tíma að vinna sig í gegnum. Hún segist þó fyrst og fremst vera þakklát fyrir fótboltaferilinn sinn og lítur til baka með gleði í hjarta þó hann hafi ekki endað eins og hún hafði séð fyrir sér.
Hún segir lífið hafa breyst mikið eftir að ferlinum lauk.
„Fótboltinn tók mikinn tíma svo ég fékk aukið frelsi til að gera aðra hluti. Starf mitt í Seðlabankanum er tímafrekt en auk þess sinni ég fjölskyldunni og áhugamálum, það nýjasta er golf. Ég hef enn mjög gaman af fótbolta, nýt þess að horfa á fótboltaleiki, horfi á börnin mín spila og spila sjálf bolta einu sinni í viku með gömlum kempum,“ segir Guðrún um lífið eftir ferilinn.
Viðtalið við Guðrúnu má lesa í heild sinni í blaðinu Eftir vinnu sem kom út fyrir helgi. Áskrifendur geta lesið greinina í heild hér.
