Guðni Guðbergsson, sviðstjóri hjá Hafrannsóknastofnun, rifjaði á fundi sem stofnunin stóð fyrir í lok maí undir yfirskriftinni „Upptakturinn að veiðisumrinu“, upp að netaveiði hafi verið stunduð hér á árum áður af meira kappi heldur núna.
Sagði Guðni að á hverju ári hafi netaveiði í Hvítá í Borgarfirði hafist þann 20. maí og þann dag hafi komið fréttir af fyrstu löxunum sem veiddust í net. Á seinni árum hafi þetta fyrirkomulag breyst og í Borgarfirði sé nánast engin netaveiði lengur, þar sem veiðifélög hliðaráa Hvítár séu með samkomulag við netaveiðibændur og greiði þeim fyrir að veiða ekki í net. Þetta sé hægt vegna þess að hver fiskur sem veiddur sé á stöng sé mun verðmætari heldur en fiskur sem veiddur sé í net.
Þess ber þó að geta að netaveiði hefur verið stunduð í Hvíta á Suðurlandi um langt skeið. Árið 2023 veiddust 3.812 laxar í net á Íslandi og voru 3.726 þeirra veiddir á Suðurlandi, eða 98%. Frá árinu 1974 hafa mest veiðst tæplega 26 þúsund laxar í net hér á landi en það var árið 1978. Árið 2013 veiddust 11.600 laxar í net á Íslandi.
Á fundinum benti Guðni jafnframt á að einn stór liður, sem gleymist oft því það sé svo langt síðan, sé að laxveiðar í sjó við strendur Íslandi hafi verið bannaðar árið 1932, sem hafi verið mikið happaspor. Núna sé öll lögleg veiði á laxi einungis heimil í fersku vatni.
Fjallað er um málið í sérblaðinu Veiði sem fylgdi Viðskiptablaðinu.
