Ríkisstjórn Ítalíu kom mörkuðum á óvart í gærkvöldi með tilkynningu um 40% hvalrekaskatt á banka landsins. Ríkisstjórnin sagði að skattheimtan ætti að skila tveimur milljörðum evra í ríkissjóð, sem nýta ætti í að styðja við fjölskyldur sem hafa farið illa úr vaxtahækkunum.
Hlutabréf í bönkum og öllum helstu lánastofnunum á Ítalíu tóku dýfu í morgun þegar markaðir opnuðu.
Hlutabréf í Intesa Sanpalo bankanum hafa fallið um 7,8% á meðan gengi UniCredit bankans hefur fallið um 6,25%.
Ríkisbankinn Monte dei Paschi di Siena féll um 9% á meðan gengi Banco BPM, þriðja stærsta banka landsins, féll um 6,8%. Áætlað virði bankanna er talið hafa lækkað um hátt í 10 milljarða evra frá því að markaðir opnuðu.
Giorgia Meloni forsætisráðherra Ítalíu hefur verið mjög gagnrýnin á banka landsins fyrir að hækka ekki vexti á innlánsreikningum með litlum innistæðum á sama tíma og lánskostnaður hefur hækkað til muna.
Skattheimtan mun einungis verða lögð á hagnað sem er tilkominn vegna vaxtamunar en samkvæmt Financial Times er umræddur hagnaður um 20% af heildarhagnaði bankanna.
Bankar á Ítalíu högnuðust um 10,5 milljarða evra fyrri hluta árs 2023 sem er 64% meira en árið áður. Búist er við því að bankarnir muni taka slaginn við ríkisstjórnina en þingið þarf að samþykkja breytinguna.
Stýrivextir á Ítalíu eru 4,25% og ársverðbólga um 5%.
