Hornamaðurinn Bjarki Már Elísson mun ásamt liðsfélögum sínum í íslenska handboltalandsliðinu standa í ströngu í janúar á Heimsmeistaramótinu (HM) sem fram fer í Póllandi og Svíþjóð. Í viðtali í veglegu Áramótablaði Viðskiptablaðsins og Frjálsrar verslunar, sem kemur út á fimmtudaginn, segir hann mótið leggjast frábærlega í sig og hann bíði spenntur eftir að hefja leik.

„Það er alltaf mikil stemning í kringum stórmótin í handbolta hjá íslensku þjóðinni og dyggur stuðningur þjóðarinnar skiptir okkur miklu máli. Stórmótin gefa okkur í liðinu einnig mikið. Flestir okkar spila á erlendri grundu sem atvinnumenn þar sem við æfum og spilum með mönnum úr hinum ýmsu áttum. Í landsliðinu erum við meira að spila fyrir okkur sjálfa og þjóðina, sem þjappar okkur í leikmannahópnum vel saman. Mér finnst alltaf jafn gaman að mæta í landsliðsverkefni og hitta strákana.“

Á síðasta stórmóti í handbolta, sem fram fór í byrjun árs, var landsliðið hársbreidd frá því að komast í undanúrslit þrátt fyrir fjarveru nokkurra lykilmanna meðan á mótinu stóð vegna Covid-19 smita. Gæðin í leikmannahópnum eru talsverð og til marks um það spilar nokkur fjöldi leikmanna liðsins stórt hlutverk í stórum liðum á erlendri grundu. Aðspurður tekur Bjarki undir með blaðamanni að full ástæða sé til bjartsýni hjá þjóðinni fyrir góðu gengi á HM. Eins og gengur og gerist í íþróttum þurfi þó margt að ganga upp svo að þær væntingar verði að veruleika.