Eigendafundur hjá Strætó fór fram á mánudaginn þar sem fulltrúar sveitarfélaga höfuðborgarsvæðisins ræddu áfram rekstrarvanda og fjárhagsstöðu félagsins. Jóhannes S. Rúnarsson, framkvæmdastjóri Strætó, segir í samtali við Viðskiptablaðið að ekki sé komin niðurstaða í hvernig bregðast á við fjárhagsvanda félagsins. Stjórn Strætó hyggst funda aftur fljótlega.

Strætó tapaði 599 milljónum króna á fyrstu sex mánuðum ársins en gert hafði verið ráð fyrir 116 milljóna tapi. Fargjaldatekjur jukust um 12% á milli ára en voru eigi að síður 9% undir áætlun og námu 924 milljónum. Af 4,4 milljarða rekstrartekjum Stræró var rekstrarframlag sveitarfélaga höfuðborgarsvæðisins 2,1 milljarður og ríkisframlag hálfur milljarður. Þá jukust rekstrargjöld um 12% á milli ára, helst vegna verðlagsbreytinga, launahækkana, olíuverðs og aukins viðhaldskostnaðar vagna umfram forsendur fjárhagsáætlunar.

Handbært fé Strætó var 733 milljónir í lok júní en þar af voru 400 milljónir eyrnamerktar vagnakaupum og 347 fyrirframgreitt framlag eigenda.

„Staðan var kynnt og það voru umræður um málið. Málið var bara sett í þann farveg að menn ætla að hittast aftur eins fljótt og hægt er án þess að hafi verið sett niður ákveðin tímasetning,“ segir Jóhannes.