Gengi lyfjafyrirtækisins Alvotech lækkaði um 11,76 % í 76 milljón króna viðskiptum, rétt fyrir klukkan 10 í morgun.
Gengið stendur nú í 900 krónum en dagslokagengið í gær var 1020 krónur. Gengið stóð í hæst í 2050 krónum 28. febrúar síðastliðinn. Gengi Alvotech hefur lækkað um 39,86% árinu.
Eins og Viðskiptablaðið greindi frá í gærkvöldi ákvað Matvæla- og lyfjaeftirlit Bandaríkjanna (FDA) ekki að afgreiða umsókn Alvotech um markaðsleyfi fyrir AVT02, sem jafnframt inniheldur gögn sem styðja útskiptileika við Humira lyfið.
Kanna fjármögnunarleiðir
Alvotech greindi frá því í gærkvöldi að fyrirtækið hyggist endurnýja umsóknina um markaðsleyfið, með þeim gögnum sem styðji útskiptileika við Humira. Lyfjaeftirlitinu beri að afgreiða endurnýjaða umsókn innan sex mánaða frá því að hún sé móttekin.
Vegna fyrirséðra tafa á markaðssetningu AVT02 í Bandaríkjunum, í ljósi niðurstöðu FDA, muni Alvotech hefja undirbúning fjármögnunar til að standa straum af kostnaði við rannsóknar- og þróunarverkefni félagsins á næstu mánuðum. Félagið vinni nú að þróun 10 líftæknilyfjahliðstæða, auk AVT02.
Fjármögnunarleiðir sem kannaðar verða séu meðal annars hlutabréfaútgáfa, sala á breytilegum skuldabréfum eða önnur tegund lánsfjármögnunar. ATP Holdings ehf., dótturfélag Aztiq sem er stærsti hluthafi Alvotech, hafi lýst yfir við Alvotech að það geri ráð fyrir að leggja fram allt að 13.600 milljónir króna (eða jafnvirði 100 milljóna dala) sem hluta af þeirri fjármögnun.
