Hlutabréfaverð líftæknilyfjafyrirtækisins Alvotech hefur lækkað um tæp 17% á síðustu tveimur vikum. Dagslokagengi félagsins var 1660 í Kauphöllinni í dag eftir um 7% lækkun í meira en hálfs milljarðs króna viðskiptum.
Gengi félagsins náði hámarki um lok febrúar, skömmu eftir að félagið tilkynnti að markaðsleyfi í Bandaríkjunum fyrir líftæknilyfjahliðstæðu við Humira væri í höfn en félagið seldi í kjölfarið hlutabréf fyrir 23 milljarða króna.
Hlutabréfaverð líftæknilyfjafyrirtækisins Alvotech hefur lækkað um tæp 17% á síðustu tveimur vikum. Dagslokagengi félagsins var 1660 í Kauphöllinni í dag eftir um 7% lækkun í meira en hálfs milljarðs króna viðskiptum.
Gengi félagsins náði hámarki um lok febrúar, skömmu eftir að félagið tilkynnti að markaðsleyfi í Bandaríkjunum fyrir líftæknilyfjahliðstæðu við Humira væri í höfn en félagið seldi í kjölfarið hlutabréf fyrir 23 milljarða króna.
Í morgun var greint frá því að eigendur meirihluta breytilegra skuldabréfa Alvotech, sem upphaflega voru útgefin 16. nóvember og 20. desember 2022 með lokagjalddaga 20. desember 2025, óskuðu eftir því að nýta rétt til að breyta skuldabréfunum í almenna hluti á genginu 10 dollarar eða um 1393 krónur á gengi dagsins
Breytiréttardagur verður á mánudaginn í næstu viku en frestur til að tilkynna um nýtingu á breytiréttinum rann út í gær.
Alvotech mun gefa út ný bréf þann 1. júlí 2024 til þeirra eigenda skuldabréfanna sem nýttu sér breytiréttinn. Heildarfjöldi nýútgefinna hluta ræðst af gengi íslensku krónunnar þann 27. júní, en áætlað er að gefnir verði út um 22,1 milljón hlutir miðað við núverandi gengi.
Viðskiptablaðið greindi síðan frá því í dag að Matvæla- og lyfjaeftirlit Bandaríkjanna (FDA) sé í þann mund að fella á brott skilyrði um að gerð sé sérstök viðbótarklínísk rannsókn á sjúklingum, til að fá samþykki fyrir útskiptanleika fyrir líftæknilyfjahliðstæður.
Að sögn Benedikts Stefánssonar, forstöðumanns fjárfestatengsla- og samskiptasviðs Alvotech, gæti breytingin leitt til umtalsverðs sparnaðar hjá félaginu við rannsóknir og þróun.
Mesta veltan á markaði var með bréf Marels en gengi félagsins fór niður um rúm 2% í 860 milljón króna viðskiptum. Dagslokagengi Marels var 494 krónur en hluthafar hafa til byrjun september til að samþykkja valfrjálst yfirtökutilboð JBT í allt hlutafé félagsins.
Hlutabréfaverð Reita, Amaroq og Sýnar lækkaði um 3% í viðskiptum dagsins.
Gengi málmleitarfélagsins Amaroq hefur nú lækkað um 9% síðastliðinn mánuð og um 7% á árinu.
Hlutabréfaverð Icelandair lækkaði um 3% og var daglokagengi flugfélagsins 0,93 krónur. Gengi Play lækkaði um rúm 6% og var dagslokagengi Play 2,6 krónur.
Úrvalsvísitalan lækkaði um 1,53% og var heildarvelta í kauphöllinni 3,3 milljarðar.