Annar viðskiptadagur breska hálfleiðarafyrirtækisins Arm hófst vestanhafs fyrr í dag en gengi fyrirtækisins á Nasdaq hefur hækkað um 2,2% það sem af er degi.
Gengið hækkaði um 10% í framvirkum samningum en hækkunin gekk að mestu til baka þegar markaðurinn opnaði.
Að mati danska bankans Saxo eiga almennir fjárfestar þátt í því að ýta gengi félagsins upp en eftirspurnin eftir fyrsta viðskiptadeginum var gríðarlega mikil og flotið lítið.
Fjárfestingasjóðurinn Softbank, sem átti allt hlutafé Arm, setti einungis 10% af félaginu á markað.
Tíföld umframeftirspurn var eftir bréfum fyrirtækisins í frumútboðinu og var útboðsgengið 51 Bandaríkjadalur.
Markaðsvirðið mögulega of hátt
Gengið hækkaði um tæp 25% á fyrsta viðskiptadegi í gær og lokaði í 64 dölum en stendur nú í 65 dölum.
Samkvæmt útboðsgenginu var markaðsvirði Arm 54 milljarðar dalir en stendur nú í 68 milljörðum. Markaðsvirði Arm er því um 9,2 þúsund milljarðar íslenskra króna.
Að mati Saxo bank er markaðsvirði Arm mögulega of hátt eins og staðan er í dag en fjárfestar virðast veðja á mögulegar framtíðartekjur fyrirtækisins sem fylgir aukinni notkun gervigreindar.
Velta með bréf Arm var sú fimmta mesta í heiminum í gær, segir bankinn.
