Bjarni Bjarnason, forstjóri Orkuveitu Reykjavíkur (OR), segist telja að til þess að framkvæmdastjóri fjármála Orkuveitunnar geti sinnt starfi sínu með fullnægjandi hætti gangi ekki að honum sé meinaður aðgangur að fjárhagslegum og rekstrarlegum upplýsingum.
Í tilkynningu segir Bjarni að Benedikt K. Magnússon, fjármálastjóri OR, hafi hvorki aðgang að nýlegu samkomulagi tengdum Ljósleiðarnum, dótturfélagi OR, og Sýn eða forsendum sem búa þar að baki þar sem aðgangur hans að fjárhagslegum upplýsingum Ljósleiðarans er takmarkaður vegna tengsla við stjórnarformann Sýnar.
Bjarni Bjarnason, forstjóri Orkuveitu Reykjavíkur (OR), segist telja að til þess að framkvæmdastjóri fjármála Orkuveitunnar geti sinnt starfi sínu með fullnægjandi hætti gangi ekki að honum sé meinaður aðgangur að fjárhagslegum og rekstrarlegum upplýsingum.
Í tilkynningu segir Bjarni að Benedikt K. Magnússon, fjármálastjóri OR, hafi hvorki aðgang að nýlegu samkomulagi tengdum Ljósleiðarnum, dótturfélagi OR, og Sýn eða forsendum sem búa þar að baki þar sem aðgangur hans að fjárhagslegum upplýsingum Ljósleiðarans er takmarkaður vegna tengsla við stjórnarformann Sýnar.
„Vegna tengsla framkvæmdastjóra [fjármála] við stjórnarformann Sýnar þarf að takmarka aðgang hans að fjárhagslegum upplýsingum tengdum Ljósleiðaranum sem er eitt af dótturfélögum OR. Það felur meðal annars í sér nýlegt samkomulag milli Sýnar og Ljósleiðarans sem er báðum fyrirtækjum mikilvægt. Hann hefur hvorki aðgang að samkomulaginu sjálfu né þeim forsendum sem þar búa að baki,“ segir Bjarni í yfirlýsingu.
Petrea I. Guðmundsdóttir, stjórnarformaður Sýnar, tilkynnti í kvöld að hún myndi ekki gefa kost á sér til áframhaldandi stjórnarsetu á næsta hluthafafundi eftir að Bjarni setti maka hennar Benedikt afarkosti vegna stjórnarstarfa hennar.
„Það er mitt mat að til þess að framkvæmdastjóri fjármála geti sinnt starfi sínu með fullnægjandi hætti gangi ekki að honum sé meinaður aðgangur að fjárhagslegum og rekstrarlegum upplýsingum. Ég hef tjáð framkvæmdastjóra fjármála þetta,“ segir Bjarni.
Petrea sagði jafnframt í yfirlýsingu að hún hafi óskað eftir fundi með formanni og varaformanni stjórnar til að fara yfir stöðu hennar en ekki hafi verið orðið við þeirri beiðni.
Bjarni segir að umrætt mál sé ekki á borði stjórnar OR heldur sé það forstjóri Orkuveitunnar sem ber ábyrgð á störfum framkvæmdastjóra fjármála.
Yfirlýsing Bjarna Bjarnasonar, forstjóra Orkuveitu Reykjavíkur í heild sinni:
„Framkvæmdastjóri fjármála OR ber ábyrgð á fjármálum Orkuveitu samstæðunnar allrar. Vegna tengsla framkvæmdastjóra við stjórnarformann Sýnar þarf að takmarka aðgang hans að fjárhagslegum upplýsingum tengdum Ljósleiðaranum sem er eitt af dótturfélögum OR. Það felur meðal annars í sér nýlegt samkomulag milli Sýnar og Ljósleiðarans sem er báðum fyrirtækjum mikilvægt. Hann hefur hvorki aðgang að samkomulaginu sjálfu né þeim forsendum sem þar búa að baki.
Það er mitt mat að til þess að framkvæmdastjóri fjármála geti sinnt starfi sínu með fullnægjandi hætti gangi ekki að honum sé meinaður aðgangur að fjárhagslegum og rekstrarlegum upplýsingum. Ég hef tjáð framkvæmdastjóra fjármála þetta. Tekið skal fram að umrætt mál er ekki á borði stjórnar OR heldur er það forstjóri OR sem ber ábyrgð á störfum framkvæmdastjóra fjármála.“
