Í vikunni birti Hagstofa Íslands tölur um hagvöxt á þriðja ársfjórðungi þessa árs. Hagvöxtur mældist 7,3% miðað við sama tímabil í fyrra. Fram kom að útflutningur hefði verið helsti drifkraftur hagvaxtar en að honum frátöldum hefði einkaneyslan mest áhrif.
Erna Björg Sverrisdóttir, aðalhagfræðingur Arion banka, benti á það í bréfi til samstarfsfólks síns að einkaneysla hefði einungis þrisvar sinnum verið meiri frá upphafi mælinga sem endurspeglaðist í miklum innflutningsvexti. Þannig hefði einkaneysla síðasta ársfjórðungs svipað til jólavertíðar fyrir heimsfaraldurinn.
„Útflutningsvöxturinn reyndist þó meiri en innflutningsvöxturinn, enda lögðu 654 þúsund ferðamenn leið sína til landsins á þriðja ársfjórðungi, svo framlag utanríkisverslunar til hagvaxtar var jákvætt. Fjárfesting jókst hins vegar aðeins um 2% milli ára og hefðbundin atvinnuvegafjárfesting dróst saman – sem er viðvörunarmerki og ákveðið áhyggjuefni ef þróunin er vísir að framhaldinu – svo hagvaxtarsamsetning var ekki alveg par excellence, þó hún hafi farið nálægt því,“ segir Erna Björg í bréfinu.
Þá nefnir hún að sterkar niðurstöður þjóðhagsreikninga síðasta ársfjórðungs muni eflaust vekja athygli peningastefnunefndarinnar, þó þær muni ekki endilega ríða baggamuninn fyrir næstu vaxtaákvörðun.
„Slíkt vald er í höndum verðbólgunnar, verðbólguvæntinga og annarra hátíðnigagna svo sem kortaveltu heimilanna.“
Fréttin birtist í nýjasta tölublaði Viðskiptablaðsins, sem kom út í morgun.
Niðurstöður þjóðhagsreikninga á 3F
| 7,3% | ||||||||
| 7,2% | ||||||||
| 22,9% | ||||||||
| 18,0% |
