Ásta Sigríður Fjeldsted, forstjóri Festi, segir að þjófnaður úr dagvöruverslunum sé að aukast. Viðskiptablaðið hefur undanfarið fjallað ítarlega um máli en langstærsti hluti þjófnaðar tengist skipulagðri brotastarfsemi.
Ásta segir að hjá Krónunni hafi þau fundið sig knúin til að taka enn fastar á málum en áður. Öryggishlið, myndavélar, aukinn mannskapur sem sinnir eftirliti og kærur til lögreglu séu hluti af þeim aðgerðum.
„Þjófnaður í verslunum er því miður viðvarandi vandi og virðist sem þetta sé frekar að færast í aukana en hitt, þrátt fyrir öflugt og sýnilegt eftirlit, bæði með okkar eigin öryggisvörðum, myndavélaeftirliti, sem og fræðslu og þjálfun starfsfólks,“ segir Ásta. „Meira ber á skipulagðri brotastarfsemi þar sem fleiri en einn eru að verki, með stærri körfur og sem fara á milli verslana í þessum eina tilgangi."
„Við sjáum ekki beina tengingu við innleiðingu sjálfsafgreiðslu, hvort sem það eru sjálfsafgreiðslukassar eða sjálfsafgreiðslulausnin okkar Skannað og Skundað. Okkar reynsla í gegnum árin er að þau sem ætla sér að stela – munu stela – sama hvaða greiðslulausnir eru í boði. Sem betur fer eru viðskiptavinir okkar lang, lang flestir traustsins verðir – og hafa sýnt það í hverju slembiúrtakinu á fætur öðru - en við tökum reglulega prófanir á þeim, sem afgreiða sig sjálfir.“
Ásta segist trúa því að það sé vilji stjórnvalda að taka á málum sem þessum, en tími og fjármagn virðist vera áskorun í þessu sambandi.
„Ég veit þó til þess að verið er að vinna að nýju samskiptakerfi lögreglu og verslana svo tekið sé á þessum brotum hratt og vel – en hingað til eru það okkar eigin öryggisverðir og öryggisdeild sem að mestu taka á þessum málum, en kalla til lögreglu ef þurfa þykir og öll brot eru kærð.“
Nánar er fjallað um málið í Viðskiptablaðinu. Áskrifendur geta lesið fréttina í heild hér.
