Fjártæknifyrirtækið Rapyd hefur fest kaup á starfsemi alþjóðlega greiðslumiðlunarrisans PayU fyrir 610 milljónir Bandaríkjadala, sem samsvarar rúmlega 80 milljörðum króna á gengi dagsins í dag.
Samkvæmt tilkynningu frá Rapyd fylgir starfsemi PayU í Indlandi, Tyrklandi og í Suð-Austur Asíu f ekki með í viðskiptunum. Kaupin eru gerð með fyrirvara um samþykki eftirlitsaðila.
„PayU hefur verið leiðandi í greiðslumiðlun í yfir 20 ár og hefur fjárfest gríðarlega í fjártækni á undanförnum árum, með áherslu á að tækni sem gerir félaginu kleift að veita framúrskarandi greiðsluþjónustu á þeim mörkuðum sem félagið starfar á. Félagið er með starfsemi á yfir 30 löndum og þjónustar söluaðila um allan heim,“ segir í tilkynningu Rapyd um viðskiptin.
Rapyd er alþjóðlegt fjártæknifyrirtæki sem starfar um allan heim. Árið 2020 keypti Rapyd íslenska færsluhirðirinn Korta og á árinu 2022 festi félagið kaup á Valitor.
Starfsemi þessara félaga hefur verið sameinuð undir nafni Rapyd og með því gerði félagið Ísland að miðstöð greiðslumiðlunar félagsins í Evrópu.
Viðskiptin fela ekki í sér neina breytingu á starfsemi Rapyd á Íslandi, sem verður áfram lykilmarkaður fyrir okkur.
„Við erum verulega spennt fyrir þessum viðskiptum enda munu þau styrkja stöðu Rapyd sem leiðandi afl í fjártækni í heiminum. PayU er frábær viðbót við okkar starfsemi og við hlökkum verulega til að starfa með teyminu hjá PayU. Viðskiptin fela ekki í sér neina breytingu á starfsemi Rapyd á Íslandi, sem verður áfram lykilmarkaður fyrir okkur. Við munum halda áfram að þjónusta viðskiptavini okkar á Íslandi með fyrsta flokks vöruframboði og þjónustu,” segr Garðar Stefánsson, forstjóri Rapyd í Evrópu um viðskiptin.
„Kaupin á PayU fela í sér mikil tækifæri fyrir Rapyd þar sem félagið er með öfluga tækni og opnar sömuleiðis tækifæri fyrir Rapyd á nýjum mörkuðum. Viðskiptin festa Rapyd enn fremur í sessi sem eitt sterkasta fjártæknifélag í heiminum í dag,”segir Arik Shtilman, forstjóri og stofnandi Rapyd, í tilkynningu.