Samkaup hafa lækkað verð á yfir 400 vörunúmerum undir vörumerkjum Änglamark og lágvörumerkinu X-tra í öllum verslunum sínum og bjóða viðskiptavinum upp á sambærilegt verð eða lægra en það var í upphafi árs. Þetta kemur fram í tilkynningu. Samkaup reka yfir sextíu verslanir sem staðsettar eru víðsvegar um landið undir vörumerkjunum Nettó, Krambúðin, Kjörbúðin og Iceland.
Um ræðir 10% verðlækkun á vörunúmerunum sem þegar hefur tekið gildi og kemur til með að haldast að minnsta kosti óbreytt fram til áramóta. Með þessum lækkunum er markmiðið að sporna gegn áhrifum verðbólgu á dagleg innkaup landsmanna, að því er kemur fram í tilkynningu.
„Við hjá Samkaupum höfum lagt allt kapp á að berjast gegn hækkunum á vöruverði og tekist að halda hækkunum í lágmarki til að mynda með innflutningi á vörumerkjum eins og Änglamark og X-tra. Þetta þýðir að verðlækkanirnar sem tóku gildi á mánudaginn eru verulegar. Við bjóðum viðskiptavinum okkar því sama verð eða lægra en það var í upphafi árs. Við höfum verið að fá gríðarlegar verðhækkanir til okkar frá framleiðendum hér heima og birgjum, margar teljum við óþarfar og að okkar mati hefur verið of auðvelt fyrir þessa aðila að velta öllum hækkunum út í verðið. Það skrifast á litla samkeppni, sterka stöðu fárra stórra birgja og verndartolla á íslenskri framleiðslu, t.a.m. á mjólk og kjöti,” segir Gunnar Egill Sigurðsson, forstjóri Samkaupa.
Ítrekað kallað eftir viðbrögðum frá birgjum og samstarfsaðilum
Síðastliðið haust sendi Samkaup frá sér bréf á alla sína birgja og samstarfsaðila þar sem kallað var eftir samstarfi til að spyrna gegn hækkunum í vöruverði án nokkurra undirtekta, að því er kemur fram í tilkynningu.
Í lok sumars sendi félagið aftur bréf á tíu stærstu birgja Samkaupa þar sem óskað var eftir 5% verðlækkun til áramóta sem þá gætu skilað sér beint til viðskiptavina, með tilliti til þess að heimsmarkaðsverð fer lækkandi og sömuleiðis stór hluti þeirra vara sem Samkaup flytur inn til landsins, einnig án nokkurs árangurs.
„Við furðum okkur á þessu og ekki síður á aðgerðaleysi hins opinbera, óbreyttum álögum á bensíni og að ekki sé afnuminn virðisauki á lykildagvöru, til að mynda á bleium og barnamat til að koma til móts við ungar barnafjölskyldur. Við fögnum þeim sem hafa tekið af skarið og fryst eða lækkað verð og höldum áfram að kalla eftir viðbrögðum birgja, framleiðenda og ekki síður hins opinbera,” segir Gunnar Egill.
Krónan frysti verð á 240 vörunúmerum
Matvöruverslunin Krónan tók af skarið í síðustu viku og frysti verð á 240 vörunúmerum undir vörumerkjum Krónunnar og First Price.
„Þetta er eitt af skrefum Krónunnar til að reyna að sporna við hækkandi vöruverði og draga úr áhrifum verðbólgu í matarinnkaupum viðskiptavina,“ sagði í tilkynningunni.
Þá bætti Ásta S. Fjeldsted, framkvæmdastjóri Krónunnar því við að verslunin sé með fleiri aðgerðir í undirbúningi.
Þá kom fram að Krónan ætli að halda verðinu stöðugu fram að áramótum til að byrja með. Komi til lækkunar innkaupsverðs eða gengisstyrkingar á vörum undir þessum vörumerkjum ætli Krónan að lækka söluverðið sem því nemur.
Komi til hækkunar á innkaupsverði eða til gengisveikingar muni sú hækkun jafnframt ekki skila sér út í verðið til viðskiptavina.
