Við erum búin að sjá mikinn vöxt í sumar og sjáum ekkert annað í framvindunni en að sá vöxtur muni halda áfram,“ segir Ásgeir Baldurs, framkvæmdastjóri Arctic Adventures, þegar hann er spurður út í framtíð fyrirtækisins. Hann segir vöxtinn þó ekki vera í líkingu við vöxtinn milli áranna 2022 og 2023. Rekstur félagsins sé nú að nálgast árin 2018 og 2019 í umfangi.
Félagið tilkynnti í síðasta mánuði um kaup á Kerfélaginu, en helsta eign þess er Kerið í Grímsnesi sem lengi hefur verið vinsæll ferðamannastaður. Ásgeir segir félagið horfa til þess að byggja Kerið upp á skynsamlegan máta og huga að náttúruvernd og verndun umhverfisins.
„Við viljum dýpka upplifun ferðamanna með því að bæta aðstöðuna og þjónustuna á svæðinu, og það er á teikniborðinu að fara í uppbyggingu þar. Svo er líka hluti af þessu að skapa sögu í kringum Kerið og fræða ferðamenn um jarðfræðina á bak við svæðið. Kerið er stórkostlegur staður sem liggur jafnframt vel við gullna hringinn og passar því vel við ferðir sem keyra hringinn.“
Ásgeir bendir á að ferðaþjónusta sé ung atvinnugrein og að hún eigi enn eftir að þróast og þroskast eins og aðrar atvinnugreinar.
„Það hafa verið miklar framfarir í lykilatvinnugreinum eins og í sjávarútvegi, og ég efast ekki um að það eigi eftir að gerast í þessari grein líka. Ég tel jafnframt að ferðaþjónusta sem atvinnugrein sé að verða faglegri. Það hafa verið settar auknar kröfur á ferðaþjónustufyrirtæki að auka fagmennsku og áherslur eins og þær sem Samtök ferðaþjónustunnar hafa lagt fram eru til góða,“ bætir Ásgeir við.
Fjallað er um Arctic Adventures afmælisblaði Samtaka ferðaþjónustunnar, Samtaka í 25 ár. Áskrifendur geta lesið greinina í heild hér.
