Týr hefur sérstaklega gaman af ávörpum Ívars A. Arndal, forstjóra Áfengis- og tóbaksverslunar ríkisins, sem fylgja ársskýrslum stofnunarinnar.
Í ár hefur forstjórinn allt á hornum sér. Enda er reksturinn í uppnámi.
Sala áfengis í verslunum ÁTVR dróst saman um 2% í lítrum talið milli ára. Eins og fram kemur í máli Ívars lækkaði hlutfall ÁTVR af greiddum áfengisgjöldum úr 73% árið 2019 niður í 68,2% í fyrra.
Ívar segir:
„Rökrétt er að álykta að þetta sé að mestu vegna ólöglegrar netsölu áfengis. Afleiðingar þessa eru að arðgreiðsla ÁTVR í ríkissjóð lækkar um 400 milljónir króna. Ef ekkert verður að gert varðandi netsöluna er líklegt að ÁTVR verði að skerða þjónustu verulega á næstu árum svo ekki komi til hallareksturs.“
Týr tekur eftir að forstjórinn telur að 110 milljóna króna hækkun á stjórnunarkostnaði milli ára dragi ekki úr arðgreiðslugetu stofnunarinnar. Hefur sá kostnaður aukist um 205 milljónir króna á síðustu þremur árum.
Í ljósi þessa getur Týr ekki varist þeirri hugsun að líkt og margar aðrar óþarfar stofnanir hins opinbera sé tilvist þeirra eingöngu til þess að þjóna stjórnendum þeirra.
Það ætti að vera öllum ljóst að ímynduð einokun ÁTVR á sölu áfengis hér á landi fæst ekki staðist lengur. Neytendur kjósa með fótunum og versla í vaxandi mæli við netverslanir sem eru með lager erlendis.
Ákall forstjórans í ársskýrslu um að lögreglan skakki leikinn er marklaust. Ofangreindri þróun verður ekki viðsnúið og sífellt minnkandi hagnaður af reglulegri starfsemi ÁTVR og samdráttur á tóbakssölu mun þýða á endanum að þessum rekstri verður sjálfhætt. ÁTVR mun enda á ruslahaug sögunnar með fyrirbrigðum eins og Viðtækjaverslun ríkisins og Bifreiðaeinkasölu ríkisins.
Neiti stjórnmálamenn að horfast í augu við þessa staðreynd er einsýnt að ÁTVR verði áfram eins og nátttröll í íslenskri verslun neytendum til sárs ama og leiðinda og skattgreiðendum til fjárhagslegs skaða.
Týr er einn af föstum ritstjórnardálkum Viðskiptablaðsins. Þessi birtist fyrst í blaðinu sem kom út 22. maí 2024.
