Umfjöllun rannsóknarblaðamanna Heimildarinnar um starfsemi Running Tide vakti töluverða athygli og varpaði hröfnunum til mikils ama skugga á afhjúpun fréttastofu RÚV.
Umfjöllun rannsóknarblaðamanna Heimildarinnar um starfsemi Running Tide vakti töluverða athygli og varpaði hröfnunum til mikils ama skugga á afhjúpun fréttastofu RÚV.
Ríkismiðilinn sagði frá því í vandaðri fréttaskýringu að áhrifavaldar væru „hluti af nýrri tegund markaðssetningar“ og að fyrirtæki leituðu í síauknum mæli til þeirra til að koma vörum sínum og þjónustu á framfæri.
Umfjöllun ríkismiðilsins um þessa nýju starfsstétt hlýtur að vera áfall fyrir fólk á borð við Binna Glee, Patrek Jamie, Birgittu Líf og BBQ kónginn sem hefur um margra ára skeið starfað við þessa iðju.
Einnig vekur það athygli að RÚV telji það sérstaka nýlundu að fyrirtæki fá frægt fólk með sér í lið til að tengja sig við vissar vörur og þjónustur.
Tíðindi virðast oft ferðast hægt upp í Efstaleiti og bíða hrafnarnir nú spenntir eftir fréttum ríkismiðilsins um nýjasta æðið á íslenskum veitingamarkaði – mathallir og smassborgarastaði.
Huginn og Muninn er einn af skoðanadálkum Viðskiptablaðsins. Þessi pistill birtist fyrst í Viðskiptablaðinu.
