Alvotech hefur samning um endurfjármögnun skulda við bandaríska eignastýringarfyrirtækið Golden Tree Asset Management, sem fer fyrir hópi alþjóðlegra stofnanafjárfesta í félaginu.
Samkvæmt Kauphallartilkynningu gerir lánafyrirgreiðslan gerir Alvotech kleift að draga úr fjármagnskostnaði, endurfjármagna lán sem eru með lokagjalddaga á næsta ári og styrkja lausafjárstöðu sína.
„Samningurinn er um lánafyrirgreiðslu að fjárhæð allt að 965 milljónum Bandaríkjadala. Gert er ráð fyrir að útgreiðsla verði í júlí 2024. Fyrri hluti, lán að fjárhæð 900 milljónir Bandaríkjadala ber 6,5% álag á SOFR (millibankavexti í dollurum), en Alvotech hefur einnig rétt til að draga á 65 milljónir til viðbótar og ber sá hluti lánsins 10,5% álag á SOFR,“ segir í tilkynningunni.
Samsvarar það um 133 milljörðum króna á gengi dagsins en lánið er á fyrsta veðrétti, til fimm ára, með lokagjalddaga í júní 2029.
Samkvæmt Alvotech ætlar félagið að nýta lánið til þess að endurfjármagna útistandandi skuldir, þar með talið þau lán sem eru með lokagjalddaga á næsta ári.
Eftirstöðvunum verður varið til að styrkja lausafjárstöðu félagsins en lánveitendur eru alþjóðlegir stofnanafjárfestar.
Samkvæmt ársuppgjöri voru heildarskuldir Alvotech um einn milljarður Bandaríkjadala í fyrra samhliða þvi að tekjur af lyfjasölu tvöfölduðust á milli ára.
„Með þessari lánafyrirgreiðslu aukum við sveigjanleika í fjármögnun og styðjum við áætlanir félagsins um vöxt á næstu árum. Við búumst við umtalsverðri tekjuaukningu samhliða markaðssetningu á fjölbreyttara úrvali lyfja, öflugri sókn á alþjóðlega markaði og áframhaldandi þróun á nýjum líftæknilyfjahliðstæðum. Endurfjármögnun lána með gjalddaga á næstu misserum auðveldar okkur að hrinda í framkvæmd áætlunum um vöxt bæði til skemmri og lengri tíma,“ sagði Joel Morales, fjármálastjóri Alvotech.