Berkshire Hathaway, fjárfestingafélag auðkýfingsins Warren Buffett, hagnaðist um 96,2 milljarða Bandaríkjadali í fyrra samkvæmt uppgjöri félagsins. Á gengi dagsins samsvarar það um 13.264 milljörðum íslenskra króna.
Mun það vera viðsnúningur á milli ára en félagið skilaði 22,8 milljarða dala tapi árið 2022 eftir miklar lækkanir á hlutabréfamarkaði það árið.
Í fjárfestabréfi sínu um helgina segir Buffett, líkt og fyrri ár, að rekstrarhagnaður félagsins gefi mun betri mynd af raunverulegri stöðu félagsins þar sem reglur um bókhaldsskil í Bandaríkjunum krefja félagið til að bókfæra hagnað og/eða tap af hlutabréfaeignum í heildarafkomu.
Rekstrarhagnaður Berkshire árið 2023 nam 37,35 milljörðum dala í fyrra sem samsvarar um 5.129 milljörðum íslenskra króna.
Handbært fé félagsins hélt áfram að aukast og nam 167,6 milljörðum dala í árslok en Buffett er sagður sitja eins og gammur á fénu á meðan hann leitar af næstu stóru fjárfestingunni sinni.
Buffett minntist Charlie Munger í fjárfestabréfinu í löngu máli en Munger starfaði við hlið Buffett í 60 ár.
Þá greindi hann frá því að á komandi hluthafafundi í maí munu Greg Abel og Ajit Jain vera með honum á sviðinu í stað Munger.
Abel og Jain leiða fjárfestinga- og tryggingardeildir Berkshire.
