Bláa lónið hf. hefur fest kaup á jörðinni Hoffelli 2 í Austur-Skaftafellssýslu af hjónunum Þrúðmari Þrúðmarssyni og Ingibjörgu Steinsdóttur, sem hafa rekið gistiþjónustu og heitar laugar að Hoffelli síðastliðinn áratug.
Samkvæmt fréttatilkynningu frá Bláa lóninu eru kaupin liður í áformum félagsins um uppbyggingu fleiri áhugaverðra áfangastaða á Íslandi.
„Markmiðið er að móta einstakan stað fyrir ferðamenn, við rætur Hoffellsjökuls og skapa segul sem styrkir Suðausturland sem áfangastað ferðamanna,“ segir í tilkynningunni en Bláa lónið hefur nú þegar gert samning við RARIK um aðgang að heitu vatni til uppbyggingar á nýjum baðstað við Hoffellsjökul.
Bláa lónið hf. hefur fest kaup á jörðinni Hoffelli 2 í Austur-Skaftafellssýslu af hjónunum Þrúðmari Þrúðmarssyni og Ingibjörgu Steinsdóttur, sem hafa rekið gistiþjónustu og heitar laugar að Hoffelli síðastliðinn áratug.
Samkvæmt fréttatilkynningu frá Bláa lóninu eru kaupin liður í áformum félagsins um uppbyggingu fleiri áhugaverðra áfangastaða á Íslandi.
„Markmiðið er að móta einstakan stað fyrir ferðamenn, við rætur Hoffellsjökuls og skapa segul sem styrkir Suðausturland sem áfangastað ferðamanna,“ segir í tilkynningunni en Bláa lónið hefur nú þegar gert samning við RARIK um aðgang að heitu vatni til uppbyggingar á nýjum baðstað við Hoffellsjökul.
„Ferðamennskan hefur byggst upp hægt og rólega hjá okkur í gegnum árin. Margt ferðafólk fer í dagsferðir að Jökulsárlóni frá Reykjavík en fer síðan ekki lengra. Með því að fá vandaða uppbyggingu hér við Hoffell, þá vonandi fjölgar þeim sem gista yfir nótt og fara lengra austur, því hér er ótrúlega margt að sjá og upplifa,“ segir Ingibjörg Steinsdóttir, fráfarandi ferðaþjónustubóndi á Hoffelli 2.
Uppbyggingin verður skammt frá Hoffellsjökli, sem er skriðjökull úr Vatnajökli, með útsýni yfir jökullónið sem þar er.
Í fréttatilkynningu segir að Gestastofa Hoffells verður ný upplýsingamiðstöð með jöklasýningu en þau hjónin, Þrúðmar og Ingibjörg, hafa safnað einstökum heimildum um Hoffellsjökul, þróun og jarðfræði svæðisins.
„Það er okkur afar mikilvægt að fara vel með þau svæði sem við njótum þess heiðurs að fá að byggja upp. Við horfum ávallt til framtíðar og leggjum mikið kapp á að horfa á heildaráhrif hverrar framkvæmdar, hvort sem þau áhrif eru umhverfisleg, samfélagsleg, rekstrarleg eða annað. Verkefnum er aðeins hleypt af stokkunum að vel athuguðu máli og þau gildi eiga við um uppbygginguna við Hoffellsjökul. Það er heiður að njóta trausts til að taka við svæðinu af Þrúðmari og Ingibjörgu og við leggjum mikla áherslu á að varðveita það góða starf sem hjónin hafa unnið,“ segir Grímur Sæmundsen, forstjóri Bláa lónsins hf.
„Við fögnum þessum metnaðarfullu áformum við Hoffell. Þétt og gott samtal milli Bláa lónsins hf. og sveitarfélagsins hefur verið til eftirbreytni og baðlónið sem þarna mun rísa nærri stórbrotnum skriðjökli verður einstakt á heimsvísu. Ferðaþjónusta er mikilvæg lykilstoð í atvinnulífi Hornafjarðar og við hlökkum til samstarfsins,“ segir Sigurjón Andrésson, bæjarstjóri Sveitarfélagsins Hornafjarðar.
