Benedikt Egill Árnason, lögmaður, eigandi og framkvæmdastjóri LOGOS, segir aðspurður gervigreindina vera eitt heitasta umræðuefnið meðal lögmanna í dag.
„Við erum að innleiða nýja gervigreindarlausn sem mun gera okkur kleift að nota hana innan okkar eldveggja. Erlendis eru lögmannsstofur að banna starfsmönnum sínum að nota gervigreindina sem er utan eldveggja þeirra,“ segir Benedikt sem hefur sótt þónokkrar ráðstefnur í tengslum við lögfræði og gervigreind á síðustu árum.
„Það er talað um að þetta muni breyta skipulagi lögmannsstofa. Þetta pýramídafyrirkomulag sem hefur verið við lýði, það er sagt að það muni breytast verulega með þessu.“
Benedikt Egill Árnason, lögmaður, eigandi og framkvæmdastjóri LOGOS, segir aðspurður gervigreindina vera eitt heitasta umræðuefnið meðal lögmanna í dag.
„Við erum að innleiða nýja gervigreindarlausn sem mun gera okkur kleift að nota hana innan okkar eldveggja. Erlendis eru lögmannsstofur að banna starfsmönnum sínum að nota gervigreindina sem er utan eldveggja þeirra,“ segir Benedikt sem hefur sótt þónokkrar ráðstefnur í tengslum við lögfræði og gervigreind á síðustu árum.
„Það er talað um að þetta muni breyta skipulagi lögmannsstofa. Þetta pýramídafyrirkomulag sem hefur verið við lýði, það er sagt að það muni breytast verulega með þessu.“
Benedikt segir ljóst að gervigreind muni hafa áhrif á öll svið lögfræðinnar en fagnar um leið tæknibreytingum í greininni.
„Svo sjáum við líka núna spennandi fyrirtæki eins og Justikal,“ segir Benedikt en LOGOS innleiddi lausn hugbúnaðarfyrirtækisins Justikal í fyrra sem gerir stofunni kleift að senda öll gögn til héraðsdómstóla á rafrænu formi.
„Það er alveg ótrúlega óskilvirkt að senda lögmenn í fyrirtökur hjá dómstólum til þess eins að bóka frest,“ segir Benedikt.
Spurður um hvernig hann sjái fyrir sér vöxt LOGOS á næstu árum segir hann mörg sóknarfæri fyrir stofuna þrátt fyrir stærð hennar.
„Ég held að sóknarfærin séu mest inn á við. Það er að bæta okkar skilvirkni og sérstaklega að mæta tækninýjungum með opnum örmum. En vöxtur fyrir íslenskar stofur og sérstaklega hjá okkur er erfiður í ljósi þess að við byggjum á litlum lögfræðimarkaði þar sem það er algengt að það séu hagsmunaárekstrar. Ef maður ætlar að reyna að fara sækja enn meiri markaðshlutdeild verður það alltaf manni fjötur um fót,“ segir Benedikt.
Aukinn áhugi á Íslandi
Benedikt segir lögmannsstofuna finna fyrir auknum áhuga á Íslandi erlendis frá á sama tíma og minna sé um að Íslendingar sæki fram erlendis. „Undanfarin ár hefur verið miklu meira um erlenda aðila að leita að viðskiptatækifærum hér heima en innlenda aðila að leita út fyrir landsteinana,“ segir Benedikt.
„Við finnum alltaf fyrir áhuga erlendis frá á Íslandi. Undanfarin ár hefur verið mikill áhugi á uppbyggingu á orkufrekum iðnaði, t. d. hefur verið mikill áhugi á því að framleiða grænt vetni. Hins vegar er Ísland nokkuð uppselt um þessar mundir og það reynist erfitt að tryggja slíkum verkefnum nægilega orku,“ bætir hann við.
Aðspurður segir Benedikt að lokum að fyrsti ársfjórðungur þessa árs hafi gengið mjög vel.
Hann segist þó finna fyrir því í samtölum sínum við lögmenn erlendis að menn telji að árið verði erfiðara en í fyrra þar sem verðbólguspár eru enn háar erlendis.
„En ég er nokkuð bjartsýnn á árið. Það hjálpar þegar þú ert með „full service“ lögmannsstofur að þegar einn þjónustuþáttur minnkar þá eykst hann bara annars staðar,“ segir Benedikt að lokum.
Hagnaður af rekstri LOGOS lögmannstofu hátt í tvöfaldaðist á milli ára og nam 778 milljónum króna í fyrra samkvæmt ársreikningi.
Um sögulega afkomu er að ræða en LOGOS hefur um áratugaskeið verið stærsta lögmannsstofan á Íslandi þegar kemur að markaðshlutdeild og veltu. Veltan jókst þó um hátt í milljarð milli áranna 2022 og 2023 og hefur því sérstaða LOGOS á íslenskum markaði aukist töluvert.
Hægt er að lesa viðtal Viðskiptablaðsins við Benedikt í heild sinni hér.
