Kominn aftur með yfir 5% í Ís­lands­banka

Sjóðastýringafyrirtækið Capital Group, stærsti erlendi hluthafi Íslandsbanka, er kominn með 5,1% eignarhlut í Íslandsbanka, sem er yfir 11 milljarðar króna að markaðsvirði, eftir að hafa bætt við sig um 0,8% hlut í bankanum í september.

Eignarhlutur Capital Group í Íslandsbanka fór yfir 5% flöggunarmörkin á fimmtudaginn síðasta, samkvæmt tilkynningu til Kauphallarinnar.

Sjóðir í stýringu Capital Group áttu samtals um 4,3% hlut í upphafi septembermánaðar. Sé miðað við meðalgengi hlutabréfa Íslandsbanka í september má ætla að Capital Group hafi keypt hluti í bankanum fyrir 1,7-1,8 milljarða króna í síðasta mánuði.

Capital Group var meðal fjögurra hornsteinsfjárfesta í frumútboði Íslandsbanka í júní 2021 og átti eftir það um 3,85% hlut. Sjóðastýringafyrirtækið tók einnig þátt í seinna útboði Bankasýslu ríkisins í mars 2022. Í kjölfar þess áttu sjóðir Capital Group 5,06% í bankanum.

Capital Group seldi meira en 1% hlut á fyrsta fjórðungi þessa árs og fór með um 3,8% hlut í lok mars síðastliðins. Félagið bætti við sig um 0,5% hlut á öðrum fjórðungi og áttu sjóðir í stýringu Capital Group samtals um 4,3% hlut í lok júní.