Líkt og Viðskiptablaðið hefur fjallað um taldi Eimskip fjölmarga annmarka á rannsókn Samkeppniseftirlitsins á Eimskip og Samskip vegna meintra samráðsbrota á árunum eftir hrun.
Eimskip endaði á að gera sátt í málinu og lagði SKE 4,2 milljarða króna stjórnvaldssekt á Samskip sem neitaði sök.
Í andmælum Eimskips fyrir sáttina sakar skipafélagið SKE meðal annars um lögbrot með því að gefa út tvö andmælaskjöl, krefjast svara við ásökunum áður en þær eru að fullu komnar fram og áður en að félagið hafi fengið aðgang að gögnum máls.
Þegar öll gögn voru á endanum afhent kom ýmislegt í ljós í rannsókn eftirlitsins á meintu samráði Eimskips og Samskipa á árunum eftir hrun.
Í andmælaskjali sem Samkeppniseftirlitið sendi Eimskip er því haldið fram að innanhúsgögn Samskipa sýni fyrirætlanir um 35% verðhækkun og segir eftirlitið að það sé til marks um ætlað samráð.
Um skýrt grín að ræða
Samkeppniseftirlitið segir að ástæða þess að Samskip töldu sér fært að „ráðast í 35% hækkun“ á gjaldskrám inn- og útflutnings hafi verið hið ætlaða samráð við Eimskip.
„Þessi ályktun er með miklum ólíkindum,“ segir í andmælum Eimskips þar sem samtímagögn sýna „skýrt að um grín“ var að ræða í viðkomandi innanhússamskiptum. Engin slík hækkun átti sér stað eða var undirbúin.
Samkeppniseftirlitið lét Eimskip einungis hafa hluta hins tilvitnaða tölvupósts í andmælaskjalinu en þegar tölvupósturinn er skoðaður í heild er frekar ljóst að um grín hafi verið að ræða, en hann hljóðar svo:
„Við urðum sem sagt sammála um margt og mikið á þessum fundi, m. a: -ígrunda kaup á Íslandspósti og sameiningu við Póstmarkaðinn-35% hækkun á gjaldskrám inn- og útflutningskaup á skipum og jafnframt að [nafn starfsmanns] myndi sjá um að dressa okkur upp fyrir græna daginn á föstudaginn!“
„Gera verður meiri kröfur til stjórnvalds um hlutlægnisskyldu“
„Vart þarf að fjölyrða um að bersýnilega virðist þannig vera um grín að ræða, enda ekkert í gögnum málsins sem bendir til þess að Samskip hafi íhugað kaup á Íslandspósti eða sameiningu við Póstmarkaðinn. Þá eru engar vísbendingar um að kaup á skipum hafi staðið til, fremur en raunar 35% verðhækkun. Átti enda engin 35% verðhækkun sér stað. Gera verður meiri kröfur til stjórnvalds um hlutlægnisskyldu en birtist í þessari framsetningu,“ segir í andmælum Eimskips.
Sem fyrr segir játaði Eimskip ári síðar og undirritaði sátt við eftirlitið.
Hörður Felix Harðarson lögmaður Samskipa hefur meðal annars sakað Eimskip um að hafa gert þetta til að kaupa sig frá málinu og útrýma óvissu en Eimskip er skráð félag á markaði.
Þann 15. júní 2021, degi áður en sáttin var undirrituð, var dagslokagengi Eimskips 286 krónur. Dagslokagengi Eimskips þann 16. júlí 2021, mánuði eftir að sátt fékkst í málið, var gengið 404 krónur sem er rúmlega 41% hækkun á einum mánuði.
Eimskip, sem er markaðsráðandi í sjóflutningum á Íslandi, gat einnig gengið að því vísu að eftirlitið myndi skella mun hærri sektarfjárhæð á Samskip í kjölfarið.