Oculis og Reitir í Úrvalsvísitöluna

Nasdaq tilkynnti í dag um niðurstöður endurskoðunar á OMX Iceland 15 Úrvalsvísitölunni. Breytingin tekur gildi mánudaginn 1. júlí næstkomandi.

Augnlyfjaþróunarfélagið Oculis, sem var skráð í Kauphöllina í apríl síðastliðnum, og Reitir fasteignafélag verða tekin inn í vísitöluna. Oculis er nú tvískráð í Kauphöllinni og á bandaríska Nasdaq-markaðnum.

Brim og Skagi, móðurfélag VÍS og Fossa fjárfestingarbanka, falla á hinn bóginn úr vísitölunni um mánaðamótin.

Úrvalsvísitala er samsett af stærstu félögunum og þeim sem mest viðskipti eru með á hlutabréfamarkaði Nasdaq Iceland. Endurskoðun á sér stað tvisvar á ári og tekur ný samsetning vísitölunnar gildi í janúar og júlí ár hvert.

Um síðustu áramót var félögum í Úrvalsvísitölunni fjölgað úr tíu í fimmtán. Nasdaq sagði að með þeirri breytingu væri miðað við að vísitalan nái utan um 80% af flotleiðréttu markaðsvirði og endurspegli þannig betur seljanlegustu fyrirtækin á markaðnum.