Peningastefnunefnd Seðlabanka Íslands ákvað á aukafundi sínum á mánudaginn að hækka fasta bindiskyldu lánastofnana úr 2% í 3% af bindigrunni. Það felur í sér að bankar þurfa að hækka verulega þá upphæð sem þeir eru með bundna á engum vöxtum í Seðlabankanum með tilheyrandi kostnaði.
Breytingin tekur gildi við byrjun næsta bindiskyldutímabils, 21. apríl.
„Ein grunnforsenda þess að unnt sé að reka sjálfstæða og trúverðuga peningastefnu er að Seðlabanki Íslands búi yfir öflugum gjaldeyrisforða. Hlutverk forðans er að draga úr áhrifum sveiflna í greiðslujöfnuði með hliðsjón af stefnu bankans í peninga- og gengismálum. Þá dregur öflugur gjaldeyrisforði úr líkum á því að fjármagnshreyfingar til og frá landinu raski fjármálastöðugleika,“ segir í tilkynningu nefndarinnar.
Að mati Peningastefnunefndar er einnig um öryggissjóð að ræða sem hægt er að grípa til þegar stór og óvænt áföll eiga sér stað sem raska gjaldeyrisöflun þjóðarbúsins.
„Slíkri tryggingu fylgir hins vegar kostnaður sem eykst eftir því sem vaxtamunur gagnvart útlöndum er meiri. Þessi kostnaður er að mestu leyti borinn af Seðlabankanum en aðrir innlendir haghafar njóta ábatans í formi hagstæðari vaxtakjara á alþjóðlegum fjármálamörkuðum.“
Samkvæmt nefndinni getur hækkun bindiskyldu haft áhrif á aðhaldsstig peningastefnunnar en í ljósi rúmrar lausafjárstöðu innlánsstofnana hjá Seðlabankanum ættu skammtímaáhrif breytingarinnar að vera takmörkuð.
Í tilkynningu bankans segir þó að til lengri tíma muni hún hins vegar skjóta traustari fótum undir rekstur peningastefnunnar og þannig auka trúverðugleika Seðlabankans og stuðla að bættri skilvirkni peningastefnunnar.
