Suðurkóresku bílaframleiðendurnir Hyundai og Kia gáfu í febrúar út uppfærslu á stýrikerfum bíla sinna til að laga galla sem óprúttnir aðilar nýttu sér til að brjótast inn í bílana og nema þá á brott.

Það virðist þó hafa gengið illa að upplýsa eigendur bifreiðanna að sækja uppfærsluna því nú rúmlega þremur mánuðum síðar er ekkert lát á bílþjófnaðarfaraldrinum.

Í byrjun mánaðar hafði uppfærslunni aðeins verið hlaðið í um 7% af þeim 8 milljónum bifreiða vestanhafs sem bera gallann. Báðir bílaframleiðendurnir hafa lagt mikið púður í að koma uppfærslunni á framfæri til eigenda bifreiðanna og segja þeir það hafa skilað því sífellt fleiri sæki uppfærsluna.