Yfir 40 sprotateymi skráðu sig til leiks í Superclass Startup Supernova sem fór fram í Sykursalnum í Grósku fyrir helgi.
Yfir 40 sprotateymi skráðu sig til leiks í Superclass Startup Supernova sem fór fram í Sykursalnum í Grósku fyrir helgi.
![](http://vb.overcastcdn.com/images/134908.width-1160.jpg)
Markmiðið með Superclass-vinnustofunum var að undirbúa teymin til þess að sækja um í Startup Supernova-hraðalinn sem verður keyrður í fimmta sinn eftir verslunarmannahelgi.
![](http://vb.overcastcdn.com/images/134909.width-1160.jpg)
Reynsluboltar úr frumkvöðlasenunni og ýmsir sérfræðingar úr atvinnulífinu komu til að miðla þekkingu sinni og hjálpa sprotateymunum að gera 18 mánaða aðgerðaráætlun fyrir verkefnin sín.
![](http://vb.overcastcdn.com/images/134910.width-1160.jpg)
Meðal fyrirlesara voru Margrét Tryggvadóttir skemmtanastjóri og forstjóri Nova sem lagði í sínu erindi áherslu á mikilvægi þess að byggja upp sterkt samheldið teymi, Tryggvi Þorgeirsson framkvæmdastjóri og meðstofnandi Sidekick Health sem fór yfir hvernig best er að ná í viðskiptavini og skala fyrirtækið.
![](http://vb.overcastcdn.com/images/134911.width-1160.jpg)
Jón Ingi Benediktsson, sérfræðingur hjá Háskóla-, iðnaðar- og nýsköpunarráðuneytinu, kenndi vinnustofu um gerð aðgerðaráætlana sprotafyrirtækja og Jason Zhangxiaoyu, landstjóri Huawei Iceland, fræddi viðstadda um tækifærin sem 5G-tæknin býður upp á en teymi sem eru að þróa lausnir tengdar 5G- og fjarskiptatækni eru sérstaklega hvött til að sækja um í Supernova-hraðalinn í ár.
![](http://vb.overcastcdn.com/images/134912.width-1160.jpg)
„Við sjáum vel þegar við keyrum vinnustofur eins og Superclass hvað það er mikil gróska í nýsköpunarsenunni á Íslandi. Það var sérstaklega ánægjulegt að sjá hve fjölbreyttur hópur sótti Superclass í ár en um 30% þátttakenda voru af erlendum uppruna. Við hlökkum til að lesa yfir umsóknir í hraðalinn en umsóknarfrestur er til 23. júní og teymin tíu sem fá sæti í hraðlinum verða síðan tilkynnt þann 11. júlí næstkomandi,“ segir Magnús Daði Eyjólfsson, verkefnastjóri Startup Supernova hraðalsins hjá KLAK-Icelandic Startups.
![](http://vb.overcastcdn.com/images/134913.width-1160.jpg)
Startup SuperNova er í umsjón KLAK - Icelandic Startups í samstarfi við Nova og Huawei með stuðningi frá Grósku hugmyndahúsi en viðskiptahraðallinn stendur yfir í sex vikur.
![](http://vb.overcastcdn.com/images/134914.width-1160.jpg)