Ríkisútvarpið ohf. (RÚV) tilkynnti í gær að kvöldfréttirnar myndu færast frá klukkan 19 til 21 í sumar til að lágmarka rask á útsendingum frá úrslitum Evrópumóts karla í knattspyrnu og Ólympíuleikunum í París.
Strax í kjölfarið skapaðist umræða um að ákvörðunin tengdist auglýsingatekjum stofnunarinnar en Stefán Eiríksson útvarpsstjóri segir það af og frá.
Í svari útvarpsstjóra við fyrirspurn Viðskiptablaðsins segir hann að vinsældir íþróttaviðburðanna sé meginástæðan fyrir tilfærslunni en RÚV áætlar að auglýsingatekjur af EM og ÓL í sumar verði í kringum 100 milljónir króna.
Ríkisútvarpið ohf. (RÚV) tilkynnti í gær að kvöldfréttirnar myndu færast frá klukkan 19 til 21 í sumar til að lágmarka rask á útsendingum frá úrslitum Evrópumóts karla í knattspyrnu og Ólympíuleikunum í París.
Strax í kjölfarið skapaðist umræða um að ákvörðunin tengdist auglýsingatekjum stofnunarinnar en Stefán Eiríksson útvarpsstjóri segir það af og frá.
Í svari útvarpsstjóra við fyrirspurn Viðskiptablaðsins segir hann að vinsældir íþróttaviðburðanna sé meginástæðan fyrir tilfærslunni en RÚV áætlar að auglýsingatekjur af EM og ÓL í sumar verði í kringum 100 milljónir króna.
„Úrslitakeppni EM karla í fótbolta sem og Ólympíuleikarnir eru viðburðir af þeirri stærðargráðu þegar kemur að áhorfi að þeir eru sýndir á aðalrás RÚV og viðeigandi tilfærslur gerðar á fastri dagskrá eins og fréttatímum þannig að skörun þar á milli verði sem minnst, líkt og áður hefur verið gert hjá RÚV af sama tilefni. Ástæðan er sú að þessir viðburðir fá mikið áhorf og m.a. af tillitssemi við þá sem vilja einnig fylgjast með fréttum í línulegri dagskrá hliðrum við tímasetningu fréttanna til meðan á þessu stendur,“ segir Stefán Eiríksson.
„Sala auglýsinga hefur ekkert með þessa ákvörðun að gera. Íþróttaviðburðir af þessari stærðargráðu eru á hverju ári með allra vinsælasta efni í sjónvarpi og fer áhorf oft vel yfir 40-50%, sem er meginástæðan fyrir þessum breytingum eins og áður sagði. Auglýsingatekjur af EM og ÓL verða væntanlega eitthvað í kringum 100 m.kr. samkvæmt upplýsingum frá RÚV sölu,“ segir Stefán Eiríksson.
Unnið að því að minnka umsvif
Lilja Alfreðsdóttir, menningar- og viðskiptaráðherra, kynnti í upphafi árs nýjan þjónustusamning við RÚV sem gildir í fjögur ár.
Í viðauka við þjónustusamninginn er yfirlýsing Lilju og Stefáns Eiríkssonar útvarpsstjóra þar sem segir að unnið verði að því að minnka umsvif Ríkisútvarpsins á samkeppnismarkaði á samningstímanum.
„Unnið verður að því á gildistíma samningsins að minnka umsvif Ríkisútvarpsins á samkeppnismarkaði, t.d. með frekari takmörkunum á birtingu viðskiptaboða og/eða með því að breyta eðli og umfangi auglýsingasölu. Unnið verður að útfærslu stafrænna lausna sem gera viðskiptavinum kleift að panta auglýsingar á netinu,“ segir í yfirlýsingunni.
Í lok janúar greindi Viðskiptablaðið frá því að stjórnendur Ríkisútvarpsins gera ráð fyrir að auglýsingatekjur aukist mikið á árinu, þvert á markmið nýs þjónustusamnings.
Stjórn Ríkisútvarpsins fjallaði meðal annars um fjárhagsáætlun ársins 2024 á fundi sínum í ársbyrjun en í fundargerð kemur fram að áætlanir geri ráð fyrir að tekjur af auglýsingasölu muni aukast um 17,4% á þessu ári.