Samkvæmt niðurstöðum þjóðhagsreikninga er áætlað nafnvirði vergrar landsframleiðslu (VLF) um 1080,3 ma.kr. á þriðja ársfjórðungi þessa árs og vöxtur hennar á föstu verðlagi (hagvöxtur) um 1,1% miðað við sama tímabil í fyrra, samkvæmt Hagstofu Íslands.
Á fyrstu níu mánuðum ársins mælist verg landsframleiðsla að raunvirði um 4,2% meiri en á sama tíma í fyrra.
Hagstofan áætlar að verg landsframleiðsla á fyrstu níu mánuðum ársins 2023 hafi aukist um 4,2% að raunvirði borið saman við fyrstu níu mánuði ársins 2022.
Þjóðarútgjöld jukust á sama tíma um 1,4% en þar af reyndist vöxtur einkaneyslu um 1,3%, samneyslu um 1,7% á meðan fjármunamyndun dróst saman um 1,3%. Útflutningur jókst um 5,7% að raunvirði en innflutningur var óbreyttur.
Þjóðarútgjöld drógust þó saman um 1,2% á þriðja ársfjórðungi samanborið við þriðja ársfjórðung í fyrra.
„Af undirliðum þjóðarútgjalda er áætlað að einkaneysla hafi dregist saman að raunvirði um 1,7% og fjármunamyndun um 4,3%. Hins vegar er talið að samneysla hafi aukist um 2,3% að raunvirði samanborið við þriðja ársfjórðung 2022,“ segir á vef Hagstofunnar.
Hagstofan áætlar að framlag utanríkisviðskipta til hagvaxtar hafi mælst jákvætt um 2,2% á þriðja ársfjórðungi og að afgangur af vöru- og þjónustujöfnuði hafi numið um 5,2% af VLF samanborið við 4,8% á sama ársfjórðungi í fyrra.
Niðurstöður þjóðhagsreikninga gefa til kynna að árstíðaleiðrétt landsframleiðsla hafi dregist saman um 3,8% að raunvirði á milli annars og þriðja ársfjórðungs þessa árs.
„Þegar kórónuveirufaraldurinn reið yfir árið 2020 og sóttvarnaraðgerðir voru við lýði dró úr umsvifum í hagkerfinu sem merkja má á þróun VLF á þeim tíma. Niðurstöður þjóðhagsreikninga gefa til kynna að VLF á föstu verðlagi hafi ekki mælst meiri síðan faraldurinn reið yfir og á þriðja ársfjórðungi var hún um 4,8% hærri en á sama tíma árið 2019.”
Samdráttur í einkaneyslu
Hagstofan greinir frá því að einkaneysla dróst saman um 1,7% að raunvirði á þriðja ársfjórðungi sem er skarpur viðsnúningur borið saman við sama tímabil árið 2022.
„Á fyrstu níu mánuðum líðandi árs jókst einkaneysla um 1,3% að raunvirði frá fyrra ári. Útgjöld Íslendinga erlendis sýna áframhaldandi samdrátt og einnig hægðist á annarri innlendri neyslu. Töluverður samdráttur mælist í kaupum ökutækja eða 5,2% en það er liður sem vegur talsvert í neysluútgjöldum heimilanna.“
Vöxtur útflutnings á þriðja ársfjórðungi þessa árs er áætlaður 0,5% miðað við sama tíma fyrir ári en líkt og undanfarna ársfjórðunga má rekja vöxtinn til útfluttrar þjónustu sem jókst um 7,4% að raunvirði frá fyrra ári. Frá fyrri ársfjórðungi reiknast um 3,1% raunvirðisminnkun árstíðaleiðrétts útflutnings á þriðja ársfjórðungi.
Áætlanir fyrir utanríkisviðskipti gefa til kynna að þau hafi skilað jákvæðu framlagi til hagvaxtar á þriðja ársfjórðungi eða sem nemur um 2,2% og er því um áframhald að ræða frá öðrum ársfjórðungi líðandi árs.
