Samstæða Vátryggingafélags Íslands (VÍS) og Fossa fjárfestingarbanka, sem hefur nú fengið nafnið Skagi, skilaði 1,8 milljarða króna hagnaði fyrir árið 2023 samkvæmt nýbirtum ársreikningi.
Einskiptisliðir á árinu námu þó 996 milljónum og vegur þar þyngst 805 milljón króna niðurfærsla hugbúnaðar sem hefur neikvæð áhrif á afkomu félagsins en engin áhrif á gjaldþol.
Samstæða Vátryggingafélags Íslands (VÍS) og Fossa fjárfestingarbanka, sem hefur nú fengið nafnið Skagi, skilaði 1,8 milljarða króna hagnaði fyrir árið 2023 samkvæmt nýbirtum ársreikningi.
Einskiptisliðir á árinu námu þó 996 milljónum og vegur þar þyngst 805 milljón króna niðurfærsla hugbúnaðar sem hefur neikvæð áhrif á afkomu félagsins en engin áhrif á gjaldþol.
Þá var einskiptiskostnaður á árinu vegna sameiningar VÍS og Fossa, forstjóraskipti hjá VÍS og undirbúnings tilfærslu á tryggingarekstri í dótturfélag um 191 milljón krónur.
Hagnaður án einskiptisliða var því um 2,8 milljarðar.
Sex stórtjón hafa áhrif á tryggingastarfsemi
Afkoma VÍS af vátryggingasamningum lækkaði verulega á milli á ára og fór um 1,2 milljarða árið 2022 í 143 milljónir í fyrra þrátt fyrir 8,2% tekjuvöxt milli ára.
Stórtjón hafði neikvæð áhrif á samsett hlutfall ársins sem er 99,5% en samsett hlutfall segir til um tjóna- og rekstrarkostnað tryggingarfélaga í hlutfalli við iðgjöld.
VÍS greindi frá því í ágústmánuði að hlutfallið yrði á bilinu 98 til 100% eftir bruna í Hafnarfirði sem leiddi til stórtjóns en alls voru sex stórtjón sem höfðu áhrif á afkomu ársins en hvert stórtjón er hærra en 100 milljónir.
„Á árinu 2023 voru teknar ákvarðanir sem hafa kostnaðarlækkandi áhrif og bæta afkomu tryggingarekstrar til framtíðar í átt að markmiði um 95% samsett hlutfall. Niðurfærsla hugbúnaðar að fjárhæð 805 milljónum króna hefur neikvæð áhrif á afkomu félagsins á árinu 2023 en mun leiða til lægri afskrifta framvegis,” segir Haraldur Þórðarson, forstjóri samstæðunnar.
SIV og Fossar skila um hálfum milljarði
Fossar fjárfestingabanki kom inn í samstæðuna á fjórða ársfjórðungi og SIV eignastýring hóf rekstur um mitt ár 2023. Tekjur af fjármálastarfsemi félaganna tveggja námu 494 milljónum króna.
Afkoma samstæðunnar af fjárfestingum eftir fjármagnsliði nam 2,8 milljörðum króna en VÍS bókfærði 1,4 milljarða króna hagnað af sölunni á Kerecis til Coloplast á öðrum ársfjórðungi og 135 milljónir á fjórða vegna væntrar viðbótargreiðslu.
Eignir í stýringu (e. AuM) námu 117 milljörðum króna í lok árs en þar er átt við eignir í stýringu og umsýslu hjá Fossum og SIV, þ. m. t. ráðstöfun viðskiptavina í erlenda sjóði stýrenda í samstarfi við Fossa.
„Árangur fjárfestinga á árinu var góður og var ávöxtun heildarsafns umfram viðmið. Fjárfestingartekjur námu 4.753 m.kr. á árinu sem samsvarar 10,7% ávöxtun en til samanburðar nam viðmiðið 2,4% hækkun á ávöxtun. Á virkilega krefjandi markaði skiluðu allir eignaflokkar safnsins jákvæðri ávöxtun, þó mest frá skuldabréfum og óskráðum hlutabréfum,” segir Haraldur.
Í Kauphallartilkynningu segir að félagið sé rétt að hefja vegferð sína í fjárfestingarbankastarfsemi og eignastýringu og hafi metnaðarfull markmið um vöxt á íslenskum fjármálamarkaði.
„Rekstur Fossa og SIV er kynntur sameiginlega sem fjármálastarfsemi samstæðunnar. Á þessum fyrstu stigum í fjármálastarfsemi eru skýr merki um traust fjárfesta með aukningu eigna í stýringu á árinu. Í lok árs voru eignir í stýringu Fossa og SIV um 117 milljarðar króna og SIV er nú með tíu sjóði í stýringu. Samhliða betri markaðsaðstæðum undir lok síðasta árs hefur rekstur Fossa með nýjum tekjusviðum bankans skilað auknum tekjum og gefur góð fyrirheit fyrir framhaldið,” segir Haraldur í uppgjörinu.
Stjórn félagsins leggur til að greiddur verði arður að fjárhæð um 0,5244 kr. á hlut eða 1.000 milljón krónur til hluthafa vegna rekstrarársins 2023.
Segir í Kauphallartilkynningu að stefna félagsins sé að greiða árlega arð sem nemur yfir 40% af hagnaði síðasta árs eftir skatta.
Þanng 24. janúar sl. tilkynnti félagið um framkvæmd endurkaupaáætlunar sem nemur allt að 500 milljónum króna að markaðsvirði (eða að hámarki 30 milljón hluta) sem mun ljúka eigi síðar en 15. mars nk.
„Síðasta ár var viðburðaríkt þar sem ný samstæða varð til með sameiningu VÍS og Fossa. SIV eignastýring hlaut jafnframt starfsleyfi á árinu og hóf starfsemi. Þar með var grunnur lagður að nýju afli á fjármálamarkaði sem stefnir á arðbæran vöxt á sviði trygginga, fjárfestingarbankastarfsemi og eignastýringar. Á síðasta ári fór mikill kraftur í sameiningu og svo samþættingu félaganna. Nýtt framtíðarskipulag samstæðu hefur verið kynnt og samþykkt af hluthöfum með tilfærslu tryggingareksturs í dótturfélag. Samstæðan skilaði 1.832 milljónum króna í hagnað eftir skatt á árinu, en hagnaður án einskiptisliða nam 2.828 milljónum króna,” segir Haraldur Þórðarson, forstjóri samstæðunnar.
