Útgjöld rússneska ríkisins jukust til muna eftir að Vladimir Pútín var endurkjörinn forseti í síðasta mánuði. Samkvæmt fjármálaráðuneyti Rússa nam halli af rekstri ríkisins á fyrstu fjórum mánuðum ársins 1.484 milljarðar rúbla, eða sem nemur um 2.250 milljörðum króna, þrátt fyrir að olíutekjur hafi aukist til muna.

Samkvæmt útreikningi Bloomberg var ríkissjóður rekinn með afgangi í mars sem snerist síðan í halla í apríl. Er talið að Rússar hafi eytt 128 milljörðum rúbla á dag í apríl, samanborið við 102 milljarða rúbla í mars.

Ríkissjóður hefur verið rekinn með halla frá árslokum 2022 en innrás Rússa í Úkraínu hefur kallað á stóraukin útgjöld.