Þingsályktunartillaga að stefnu um stuðning Íslands við Úkraínu 2024 til 2028 var samþykkt á ríkisstjórnarfundi í gær en með henni verður fest í sessi áætlun um áframhaldandi stuðning Íslands við Úkraínu.
Gert er ráð fyrir að framlög ársins 2024 verði aukin frá fyrra ári og heildarframlög íslenskra stjórnvalda vegna Úkraínu verði sambærileg stuðningi Norðurlandanna.
Þingsályktunartillaga að stefnu um stuðning Íslands við Úkraínu 2024 til 2028 var samþykkt á ríkisstjórnarfundi í gær en með henni verður fest í sessi áætlun um áframhaldandi stuðning Íslands við Úkraínu.
Gert er ráð fyrir að framlög ársins 2024 verði aukin frá fyrra ári og heildarframlög íslenskra stjórnvalda vegna Úkraínu verði sambærileg stuðningi Norðurlandanna.
Í tilkynningu á vef Utanríkisráðuneytisins segir jafnframt að ákvörðun um heildarframlög til Úkraínu í tengslum við fjárlög ár hvert verði einnig tekin, en að lágmarksfjárhæð verði tryggð til næstu ára.
„Í dag eru liðin tvö ár frá upphafi ólöglegrar og tilefnislausrar allsherjarinnrásar Rússa í Úkraínu. Innrásarstríðið er ein alvarlegasta öryggisógn sem steðjað hefur að Evrópu frá lokum seinni heimsstyrjaldarinnar. Langtímaáætlun í þessum efnum mun marka tímamót sem sýna svo ekki verður um villst að okkur er alvara með að styðja baráttu úkraínsku þjóðarinnar eins lengi og þarf,“ segir Bjarni Benediktsson utanríkisráðherra.
Þingsályktunartillagan verður kynnt í þingflokkum og utanríkismálanefnd á næstu dögum. Á heimasíðu ráðuneytisins segir einnig að sterk þverpólitísk samstaða hafi ríkt á Alþingi um stuðning við Úkraínu.
„Úkraínumenn hafa nú í tvö ár barist fyrir þessum grundvallargildum, sem fullveldi Ísland byggist meðal annars á. Því má með sanni segja að langtímastuðningur okkar við öryggi og sjálfstæði Úkraínu sé sömuleiðis langtímastuðningur við öryggi og sjálfstæði Íslands,“ segir Bjarni.
