Heimildin er að fara streyma nýjum þjóðmálaþætti í samkeppni við Rauða borð í samkeppni við þá Smárakazov-bræður Gunnar og Sigurjón. Þetta þótti slík stórtíðindi í Efstaleiti að stjórnendur síðdegisútvarps Rásar tvö kölluðu Aðalstein Kjartansson blaðamann Heimildarinnar í drottningarviðtal á mánudag til þess að ræða þessi merku tímamót í íslenskri fjölmiðlasögu.

Reyndar hafa hrafnarnir tekið eftir að allt það sem tengist Heimildinni er stórmerkilegt í augum starfsmanna Ríkisútvarpsins. Iðulega er vísað til umfjallana blaðsins í fréttaflutningi ríkismiðilsins og eru starfsmenn fjölmiðilsins áberandi álitsgjafar í Efstaleiti.

Um þetta eru fjölmörg dæmi. Til að mynda þurftu þeir sem voru svo óheppnir að missa af Helga Seljan fjallar um málefni Marel í þættinum Þetta helst í síðustu viku ekki að örvænta. Þeir gátu einfaldlega hlustað á Þórð Snæ Júlíusson ritstjóra Heimildarinnar fjalla um sama mál í Silfrinu á mánudagskvöld. Ekki þurftu hinir kvöldsvæfu heldur að örvænta: þeir gátu hlustað á sama Þórð fjalla um sama mál í morgunútvarpi Rásar 1 á þriðjudag, um tíu klukkustundum síðar.

Þetta kalla hrafnarnir góða þjónustu Ríkisútvarpsins við lesendur Heimildarinnar – og eigendur ef út í það er farið.

Spursmál Stefán Einars

Starfsemi annarra fjölmiðla vekur ekki jafn mikla eftirtekt í Efstaleiti. Þannig hafa hrafnarnir ekki enn heyrt drottningarviðtal við Stefán Einar Stefánsson vínkaupmann og blaðamann á Morgunblaðinu á Rás 2.

Fyrstu gestir í Spursmálum, nýjum þjóðmálaþætti Stefáns Einars Stefánssonar, verða þær Kristrún Frostadóttir og Þórdís Kolbrún Reykfjörð Gylfadóttir.

Hann er einnig að fara í loftið með nýjan þjóðmálaþátt undir hatti blaðsins á föstudag. Þátturinn ber nafnið Spursmál og verður sendur út vikulega. Fyrstu gestir Stefáns verða þær Kristrún Frostadóttir formaður Samfylkingarinnar og Þórdís Kolbrún Reykfjörð Gylfadóttir fjármálaráðherra og varaformaður Sjálfstæðisflokksins.

Hrafnarnir hlakka til að horfa á þáttinn enda er Stefán skeleggur spyrill; Kristrún hefur farið með himinskautum með flokk sinn í fylgiskönnunum og Þórdís er auðvitað stærsta nafn íslenskra stjórnmála í bókstöfum talið að Arndísi Önnu Kristínardóttir Gunnarsdóttir Pírata undanskilinni.

Huginn og Muninn er einn af föstum ritstjórnardálkum Viðskiptablaðsins.