Magnús Harðarson, forstjóri Kauphallarinnar, er þokkalega bjartsýnn á skráningar í Kauphöllina í ár þrátt fyrir að seljendur hlutabréfa í almennu hlutafjárútboði Íslandshótela ákváðu í gærkvöldi hefðu ákveðið að falla frá útboðinu og þar með skráningu félagsins á Aðalmarkað.
Magnús Harðarson, forstjóri Kauphallarinnar, er þokkalega bjartsýnn á skráningar í Kauphöllina í ár þrátt fyrir að seljendur hlutabréfa í almennu hlutafjárútboði Íslandshótela ákváðu í gærkvöldi hefðu ákveðið að falla frá útboðinu og þar með skráningu félagsins á Aðalmarkað.
„Við í Kauphöllinni höfum vonast til að auka veg ferðaþjónustunnar í Kauphöllinni og auka möguleika til fjárfestinga í þessari stærstu útflutningsgrein þjóðarinnar. Það var því tilhlökkunarefni að fá Íslandshótel í Kauphöllina, sem glæsilegan fulltrúa ferðaþjónustunnar,“ segir Magnús í samtali við Viðskiptablaðið.
Samkvæmt tilkynningu Íslandshótela í gærkvöldi tóku vel á þriðja þúsund aðilar þátt í útboðinu sem skráðu sig fyrir hlutum að verðmæti ríflega 8 milljarða króna.
„Það fékkst þó ekki áskrift í útboðinu fyrir öllum boðnum hlutum og því hafa seljendur ákveðið að falla frá útboðinu,“ segir í tilkynningu Íslandshótela.
Félagið setti á sölu 41,7% af útgefnu hlutafé Íslandshótela. Ef full áskrift hefði fengist í útboðinu hefði heildarsöluandvirði verið um tæplega 12,9 milljarðar króna.
„Okkar sýn er áfram að Íslandshótel og fleiri félög í ferðaþjónustu eigi fullt erindi í Kauphöllina og hafi mikið gagn af skráningu. Áhrifin eru þannig fyrst og fremst að tefja eitthvað uppbyggingu ferðaþjónustunnar á markaði. Við fengum þó þær upplýsingar úr þessu útboði að ekki vantaði áhuga almennings, þar sem áskriftir voru hátt í þrjú þúsund,“ segir Magnús.
Davíð Torfi Ólafsson, forstjóri Íslandshótela, sagði fyrr í dag að erfiðar markaðsaðstæður væru „langstærsta“ ástæðan fyrir því að ekki fékkst full eftirspurn í hlutafjárútboði hótelkeðjunnar.
Fagfjárfestar hafi ekki tekið jafn mikinn þátt og vonast var eftir. „Markaðir eru bara mjög erfiðir,“ sagði Davíð Torfi í samtali við Viðskiptablaðið í hádeginu.
„Við fundum fyrir miklum áhuga á félaginu og miklum áhuga frá almenningi. Allt ferlið gekk mjög vel. Svo er það bara þannig, eins og við vissum, að markaðir eru búnir að vera erfiðir. Við vildum samt láta reyna á þetta en þetta gekk ekki eftir,“ bætti hann við.
Fjárfestaáhugi kemur venjulega fyrr fram
Aðspurður segir Magnús að hann reki ekki minni til þess að hætt hafi verið við skráningu með þessum hætti.
„Venjulega kemur það fram fyrr í ferlinu ef fjárfestaáhugi er ekki í takt við það sem vonast var eftir,“ segir Magnús.
Hann er þó engu að síður bjartsýnn á framhaldið.
„Við erum þokkalega bjartsýn fyrir árið. Undirliggjandi áhugi á skráningu er mikill og félög sem við erum í samtali við munu örugglega fylgjast vel með markaðsaðstæðum. Það má samt ekki gleyma því að „markaðsaðstæður“ eru margslungið fyrirbæri, geta t. d. verið mismunandi eftir greinum á mismunandi tímum,“ segir Magnús.
Máli sínu til stuðnings bendir hann á skráningu og hlutafjáraukningu Oculis í síðasta mánuði.
„Við sjáum t. d. vel heppnaða fjármögnun Oculis í aðdraganda skráningar fyrir réttum mánuði. Það sem liggur fyrir núna er skráning Ice Fish Farm síðar í þessum mánuði og svo er gert ráð fyrir flutningi Play á Aðalmarkaðinn innan skamms. Að því sögðu þá vonum við að Íslandshótel sjái sér hag í skráningu við betra tækifæri,“ segir Magnús.
